Natalgeden ti kasasaad ni Rolan Kerwin Espinosa kalpasan a napaltogan iti barukongna iti maysa a campaign rally iti Barangay Tinag-an, Albuera, Leyte idi Huebes, Abril 10.
Agkandidato ni Espinosa a para mayor, idinto a ti kabsatna a ni Mariel, a nasugatan met bayat ti insidente, ti running mate-na (para bise mayor). Maysa a balasitang a timmabuno iti rali a kaduana dagiti dadakkelna ti nasugatan.
“Saanda a kayat nga agbalinak a mayor ti Albuera ta maapektaran ti negosioda,” kinuna ni Espinosa iti live post-na iti Facebook.
Kinunana a nakemmegen dagiti polis ti pimmaltog. Nupay kasta, saan pay a naberipikar dagiti autoridad daytoy nga impormasion.
Marcos, inkalikagumna ti disiplina iti kalsada iti baet ti yaadu ti mapagpagteng a road rage
Innayon ni Espisnosa a ti SUV a nausar a kas getaway vehicle ket naduktalan iti maysa a balay iti Barangay Tinag-an.
Segun ken Espinosa, saan a mariribukan iti napasamak. “Kas iti inkarik kadakayo, idatonko ti biagko para kadagiti taga-Albuera,” kinunana.
Innayonna nga imbaon ti Dios isuna nga agsubli iti Albuera tapno ituloyna dagiti plano ni tatangna a sipupudno a panagagserbi kadagiti tattao.
Napapatay ti amana a ni Rolando Espinosa Sr. iti pagbaludan bayat ti raid nga insayangkat dagiti polis sumagmamano a bulan kalpasan a nabotosan a mayor ti Albuera idi 2016.
Kinuna met ni Mariel Espinosa a nairanta ti pammaltog tapno mapagulimek dagiti Espinosa. (Marie Tonette Marticio/Manila Bulletin)
