IMPENNEK ni Salvino ti maudi a sanutna iti Maestro a nairaked iti dakkel nga adigi. Dina nadlaw a naparsiakan ti bukot ti kanawan a pungopunguanna iti dara ti sugatsugaten a bukot ti Maestro.
Dandani aglusdoy ti Maestro iti pannakaparigatna. Nagayus ti dara manipud kadagiti sugat iti bagina, kadagiti sakana agingga iti marmol a suelo.
Umanangsab ni Salvino a nangyawat iti pagsanut iti padana a soldado a mangsublat kenkuana.
Corpuz, indauluanna dagiti nangabak iti Salip iti Sarita 2025 ti Bumanglag Awards
“Umanay daytan,” kinuna ti senturion a panguloda.
Impan dagiti soldado ti Maestro iti pangukoman a kaabay ti palasio ni Gobernador Pilato.
Nagpakada ni Salvino iti senturion a mapan biit iti kuartelda tapno uminum. Napalalo ti bannog ken wawna. Kasla maur-uram ti bagina iti panagriknana.
Iti kuartelda, imminum ken nagdiram-os ni Salvino tapno mabang-aran.
Masmasdaaw idi dina maikkat ti dara iti bukot ti pungopunguanna. Uray no kasano ti panangradradna, dina latta maikkat daytoy. No matmatanna ti dara, kasla sadiwa latta daytoy. Nanayonan manen ti gurana iti Maestro.
Idi agin-inanan, simmangpet ni Marcos, ti negosiante a manong ni Claudia a baketna. Pagaw-awiden ni Marcos ta agngangabit ni Julius, ti bugbugtong nga anakna nga agtawen iti siam. Nabayag bassiten a masaksakit ti ubing ket awan magudgudilan dagiti ay-ayabanda a mangngagas.
Dinagdagus ni Salvino ti nagpakada iti senturion a pangulona. Agsagsaganan dagiti soldado a mangipan iti Maestro idiay Golgota tapno ilansada iti padeppa sadiay. Dua a kriminal ti kadua ti Maestro a mailansa iti dayta a bigat.
Nagkabalio ni Marcos nga immay. Intugotna ti kabalio ni Salvino tapno dardaras a makaawidda.
Kasla nagtupak ti langit ken ni Salvino idi sumangpet iti balayda. Agdudung-aw ken agsasangit ti tallo pay a kabbalayna. Natayen ti dungdungnguenna nga anak!
Dinagdagusna ti simrek iti kuartoda nga agassawa a ‘yan ti anakna.
Immipus met da Marcos ken ti tallo pay a kabbalayda iti siled.
“Awanen ti anakta! Ay, awanen ni Julius!” kinuna ni Claudia a timmakder idi makitana ti lakayna.
Saan nga intaltalek ni Salvino ti baketna. Nagtugaw iti iking ti katre ti ubing. Apagapaman a minatmatanna ti nakabesbessag nga ubing.
“Anakko! Anakko!” insaibbekna. “Julius, agriingka, balong! Agmulagatka!” Nagduaanna nga iniggaman dagiti kullapit nga abaga ti ubing sa winagwagna daytoy. “Agriingka, Julius! Agmulagatka, anakko!” inulit-ulitna. Nakullaapan dagiti matana iti lua.
Idi di latta agmulagat ti ubing, agan-anug-og ni Salvino a nangap-apros iti ulo ti ubing. Impababana iti rupa, tengnged ken barukong daytoy.
Nasdaaw dagiti kakabagianda idi makitada ti panagayus ti dara iti bukot ti pungopunguan ni Salvino. Nagayus ti dara iti babaet dagiti ramay ken iking ti dakulap ni Salvino. Ket natina ti ulo, rupa, tengnged ken barukong ti ubing. Ti nakakaskasdaaw, kasla adda bukodna a biag ti dara nga umadu. Nagayus met ti dara iti ulo, rupa, tengnged ken barukong ti ubing.
Nagiinnarasaas dagiti kakabagianda.
“Salvino!” naipigsa ni Claudia, a nupay agar-arubos ti luana, nakitana met ti mapaspasamak. “Ania dayta dara nga aggapu iti imam?”
Impagarup ni Claudia ken dagiti kakabagianda nga adda sugat iti ima ni Salvino.
Napasardeng ni Salvino nga aganug-og ken mangap-apros iti anakna. Linintegna ti panagtugawna iti iking ti katre. Nagkiremkirem tapno lumawag ti panagkitana.
Anian a mulagatna idi makitana a daradara ti imana. Agay-ayus ti dara iti pungopunguanna agingga iti sikona ket nagtedted daytoy iti katre. Kellaat a nalagipna ti Maestro.
“Ti Maestro! Ginamudnak!” Timmakder a mangmesmesmes. Inwarsina ti dara nga agay-ayus latta iti takiagna. Pinunasanna babaen ti kanigid nga imana ti dara iti kanawanna.
Dina maawatan no apay nga agtultuloy ti panagadu ti dara. Immadu metten ti dara iti kanigid a pungopunguanna ket agwarasen iti imana.
Uray dagiti naiwarsi a dara iti suelo ken dagiti nagtedted iti katre immadu metten dagitoy.
Nagbassawang ni Salvino. “Uloyak daydiay a Maestro inton makitak manen!” inkarina.
Bayat ti panagbassawang ni Salvino, imbaliw ni Claudia ti imatangna iti natay nga anakna. Dimmakkel ti mulagatna idi madlawna nga in-inut nga agsubli ti maris ti kudil ti anakna.
“Salvino! Kitaem ti anakta!” nayikkisna. Naikkan iti baro a namnama nga agbiag manen ti anakna.
Naiturong amin a mata iti ubing. Nadlawda a dagus ti in-inut a panagsubli ti maris ti kudil ti ubing. Ammoda lattan nga adda datdatlag a mapaspasamak iti ubing. Ket agbiag manen daytoy.
Nagsubli ni Salvino a nagtugaw iti iking ti katre ti ubing. Nagdadakkel dagiti anges-angesna, nakadakdakkel ti mulagat ken ngangana a mangpalpaliiw iti panagsubli ti maris ti kudil ti anakna. Tineppelanna ti riknana a mangsagid iti ubing amangan no agsardeng ti panagsubli ti maris ti kudil ti anakna. Agparparikna nga agbiag manen ti anakna.
Idi kuan, nagsung-ab ti ubing a kasla kinamakamna ti angesna. Sa nagmulagat. Umanal-al a kasla nabannog unay. Impalawlawna dagiti matana kadagiti nakamulagat ken nakanganga a kumitkita kenkuana. Idi malasinna ti ama ken inana, agsangiten.
“Ay, ti anakko! Sibibiag ti anakko!” kinuna ni Salvino. Binangonna nga inarakup ti anakna.
“Anakko! Anakko!” insangit met ni Claudia a napalalo ti ragsakna. Immarakup metten iti anak ken iti asawana.
“Milagro!” nayesngaw met dagiti kabagianda.
Rimmuk-at ti ubing iti arakup dagiti dadakkelna. Idi gandatenna ti bumaba iti katrena, timmakder dagiti dadakkelna tapno wayaanda. Naparagsit ti ididissaag ti ubing iti katre. Nalinteg ti takderna a nangsango kadagiti dadakkelna.
“Ama, ina, nalaingakon! Awanen ti sakitko!” kinunana iti naragsak a timek.
Kasla saan latta a mamati dagiti agassawa ken dagiti kakabagianda iti nangngeg ken makitkitada. Saanda a makatimek.
“Nagtagtagainepak, ama, ina,” kinuna ti ubing. “Maysa a dakkel a lalaki ti nakitak. Daradara ti imana. Inaprosanna ti ulok. Ket awanen ti sakitko!”
Nakigtot ni Salvino ken dagiti adda iti siled iti nangngegda. Kinita ni Salvino dagiti imana a daradara. Ne, nagmagan dagiti dara kadagiti imana! Uray dagiti dara iti ulo, rupa, tengnged ken barukong ti ubing, nagmagada metten.
Di patien ni Salvino a ti dara ti Maestro ti nangbiag iti anakna. Ngem nalagipna dagiti damag a rinibun ti masakit a pinaimbag ti Maestro.
Patien ni Claudia nga adda pannakainaig ti dara kadagiti ima ti lakayna iti panagbiag manen ti anakna. Adda misterio ti dara. Adda bilegna nga umadu ken agwaras. Konektado ti dara iti ima ni lakayna iti naitagtagainep ti anakna maipapan iti daradara nga ima ti lalaki a nayapros iti ulona.
“Salvino, naggapuan ti dara daytoy imam?” sinaludsod ni Claudia iti lakayna.
“Iti aw-awaganda a Maestro,” insungbat ni Salvino. “Naparsiakanak iti darana itay sansanutak iti adigi a nakairakedanna.”
“Milagroso ti darana!” nagtimek ni Marcos. “Ti darana ti nangbiag ken ni Julius!”
Saan a nakatimek ni Salvino. Timmakder. Minatmatanna manen dagiti nagmaga a dara kadagiti imana. Malagipna manen dagiti impennek a panangsansanutna iti Maestro. Agkedked latta ti riknana a mamati a ti dara ti Maestro ti nangbiag iti anakna.
“Ina, kayatko ti uminum!” kinuna ni Julius. “Mawawak unay!”
Pinainumda ni Julius. Pudno a mawaw ti ubing. Inibusna ti sangakalis a danum.
Inasitgan ni Marcos ni Salvino. “Kayong, milagroso ti dara ti Maestro,” kinunana. “Patiekon dagiti damag a nalaing a mangngagas ti Maestro. Uray darana laeng, kabaelanna a biagen ti natay. Napateg ti darana, kayong. Urnongentayo koma.”
Nagpaala ni Claudia iti danum ken nadalus a lupot. Binabasana ti lupot sa pinunasanna dagiti nagmaga a dara iti ulo, rupa, tengnged ken barukong ni Julius.
Apaman a napunasan ni Julius, nagpakada daytoy a rummuar iti balay ta kayatnan ti agay-ayam.
“Dimo ibagbaga, wen, ti maipapan iti dara,” kinuna ni Salvino iti anakna.
“Wen, ama,” insungbat ti ubing ket nagdardarasen a rimmuar iti kuarto.
Madamdama bassit, nangngeg da Salvino ti ikkis ti buteng-- sa idi agnadnad, dagiti napigsa ken naragsak a timek dagiti kakaarruba ken kakabagianda a nakakita ken ni Julius a nasalun-at manen.
Insublat ni Claudia a pinunasan dagiti dara kadagiti ima ni Salvino. Nasdaaw ni Salvino idi nakalaklaka a napunas dagiti dara kadagiti imana. Malagipna ti rigatna itay a nangradrad kadagita a dara ngem dina naikkat dagitoy.
Pinunasan ni Claudia dagiti nagmaga a dara iti katre ken iti suelo. Idi malpas, pinespesna ti lupot iti batog ti kalis a naginuman itay ni Julius. Kalpasanna, inanusanna nga inikkat dagiti dimket a dara iti lupot. Ngem dina naala amin ta simmekseken dagitoy iti linabag ti lupot.
“Napateg daytoy a lupot,” kinunana. “Patiek a makaagas met.” Imbalaybayna daytoy iti tali a naibarteng iti siled.
Minatmatan ni Salvino ti dara iti kalis. Nasdaaw idi makitana nga umad-adu manen ti dara. Sadiwa manen. Sibibiag manen. Pinagunianna da Claudia.
Napartak ti panagadu ti dara. Madamdama bassit, nakadanonen daytoy iti ngiwat ti kalis ket naglippias ti danum a laokna. Namnamaenda nga aglippias ti dara iti kalis. Indissoda daytoy iti malukong. Ngem nagsardeng nga agadu ti dara idi mapunno ti kalis.
“Ania itan ti sumaruno?” kinuna ni Salvino.
Kas sungbat ti saludsodna, in-inut a nagbalay ti dara. Kasla nalabaga a gulaman ti langanan. Idi agbayag pay bassit, timmangkenen daytoy a kasla bato. Nagsisinnublatanda a rinikna. Talaga a bimmaton ti dara.
“Awan koma ti mangipug-aw kadagiti nasaksiantayo ditoy,” kinuna ni Salvino. “Agpeggad ti biagtayo no maammuan dagiti kabusor ti Maestro daytoy. Idulintayo a nasayaat daytoy.” Intudona ti bimmato a dara. “Patiek nga adunto ti maitulongna kadatayo kadagiti umay nga aldaw.”
Rimmuar ni Salvino iti balay. Imbagana kadagiti kakabagian ken kaarrubada nga agur-uray iti damag a saan a pudno a natay ni Julius no di ket napukawna laeng ti puotna. Ngem immimbagen ti ubing gapu met laeng kadagiti agas a tinomtomarna.
NAGKABALIO ni Salvino a kimmamakam idiay Golgota. Idi sumangpet sadiay, ipapaiddan dagiti kakaduana a soldado ti Maestro iti padeppa a pakailansaanna.
Immunan dagiti dua a kriminal a nailansa kadagiti padeppada. Agbitbitinda payen kadagiti napatakder a padeppada.
Nakaad-adu ti agbuya. Makumikom dagiti soldado a mangtengtengngel iti urnosda.
Agsagsagana ni Salvino a dumsaag iti kabaliona idi mangngegna ti napigsa a panagdisso ti maso iti landok. Kagiddan dayta nga uni, kellaat a kasla sinalput ti natangken a banag ti tengnga ti kanigid a pungopunguanna. Naklaat ken napaasug. Napukawna ti balansena ket natinnag iti daga.
Ngem sakbay nga agdisso iti daga, maysa manen a napigsa nga uni ti panagdisso ti maso iti landok. Kasla sinalput ti natangken a banag ti kanawan a pungopunguanna.
Nagasug nga agtirtiritir iti napalalo a saem. Kinitana dagiti pungopunguanna. Awan met ti sugat dagitoy.
Dina pay nasul-oy ti angesna no ar-arigen, nakangngeg manen iti panagdisso ti maso iti landok. Uray la naikugtarna dagiti sakana idi kasla sinalput ti natangken a banag ti tengnga dagiti dapanna.
Napatugaw a nangkammet kadagiti dapanna. Awan ti makitana a sugat dagitoy. Ngem anian, kasla mapugsat ti angesna iti sakit nga aggapu dita. Uray la nagkaling-etan ken nagayus ti angedna.
Maysa a soldado iti asideg ti nakakita itay iti pannakatinnag ni Salvino iti kabalio. Nagdardaras daytoy nga immarayat.
“Ania ti mapaspasamakmo, kadua?” sinaludsodna ken ni Salvino.
Saan a makapagsao ni Salvino iti napalalo a sakit. Intudona lattan dagiti pungopunguan ken dapanna. Saan a naawatan ti soldado ngem binatakna ni Salvino sa inassibayna daytoy nga impatugaw iti asideg a bato.
“Kellaat a nagsakit dagiti pungopunguan ken dapanko!” kinuna ni Salvino idi makapagsaon. Binidingna dagiti pungopunguanna ngem awan ti makitana a sugat dagitoy. Limmabaga laeng dagiti tengngada.
Tinapik ti padana a soldado ket nagsublin daytoy iti sigud a puestona.
Idi kuan, binangonen ti sumagmamano a soldado ti padeppa a nakailansaan ti Maestro. Naipisok ti puon ti padeppa iti nauneg nga abut.
Medio pasikig ti Maestro iti nagtugawan ni Salvino. Nakitana a tinaliaw ti Maestro. Iti panagsabat dagiti matada, kasla naisit ni Salvino iti nagtugawanna ket inlayonnan ti timmakder.
Adda bileg a mangguyguyod ken ni Salvino tapno umasideg iti Maestro. Idi ibaliw ti Maestro ti imatangna, lininteg ni Salvino ti takderna. Nariknana a naalay-ayan bassit ti sakit kadagiti pungopunguan ken dapanna.
In-inayad ti pannagnana nga agturong iti Maestro. Inkarigatanna a di madlaw ti panagpilayna. Iti adayo bassit a masanguananna, nakitana ti tallo a babbai ken maysa nga agtutubo a lalaki a simmina iti grupo dagiti agbuybuya. Agturongda met iti padeppa ti Maestro.
Idi addan iti sango ti padeppa, tinangadna ti Maestro. Nagsabat manen dagiti matada. Anian a nagdungngo dagita a mata!
Dina napupuotan nga inngato dagiti nakadata a pungopunguanna agingga iti batog ti siketna. Nadlawna a kasla adda nakaut iti kaungganna ket nagpukaw a namimpinsan dagiti ut-ot kadagiti pungopunguan ken dapanna. Timbog ti luana a dina napupuotan.
“Maestro, agyamanak,” inyarasaasna. Nagyaman iti pannakaisubli ti biag ni Julius nga anakna.
Nainayad ti tung-ed ti Maestro.
Nakaasidegen ti tallo a babbai ken ti agtutubo a lalaki iti likudan ni Salvino. Dinagdagus ni Salvino a pinunasan dagiti luana sa napan nagreport iti senturionna.
Iti dayta a rabii, sinarita ni Salvino kadagiti kabbalayna dagiti napaliiwna iti Golgota. Ti pannakailansa ti Maestro ken ti kasla panangsalput ti natangken a banag kadagiti pungopunguan ken dapanna. Ti ipapatay ti Maestro. Ti panagsipnget ti tangatang ken aglawlaw iti mumalmalem. Sa ti panaggurgurruod ken panagkimkimatna. A sinaruno ti apagbiit a tudo ken napigsa a ginggined. Nagkulkullayawda amin ta impagarupda nga immulogen dagiti sairo manipud ti impierno tapno dusaenda ida a nabati iti turod.
Sinarita pay ni Salvino ti panangibabada kadagiti kriminal kadagiti padeppada sa tinuktukkolda dagiti tultulang dagitoy. Saanda kano nga inan-ano ti bagi ti Maestro gapu ta natayen daytoy iti padeppa. Imbaga ti senturion nga adda umay mangala iti bangkay ket isudan ti mangipumpon iti Maestro.
Interesado ni Marcos iti napasamak kadagiti pungopunguan ni Salvino. Inamirisna dagiti pungopunguan ti kayongna. Nakalablabaga ti tengnga dagitoy. Kasla adda dara a di makaruar dita. Silalag-an a piniselpiselna dagitoy.
“Nasakit?” sinaludsodna.
“Saan,” inwingiwing ni Salvino.
“Kayong,“ kinuna ni Marcos, “adda kenkan ti dara ti Maestro. Iti ababa a pannao, agkaykaysan dagiti bagiyo.”
“Kasano a nagbalin a kasta, kayong?” Nariribukan unay ni Salvino.
“Sinagepsep ti kudilmo ti dara a naiparsiak iti bukot ti pungopunguam. Nailaoken ti darana iti daram. Agtartarayen ti darana kenka,” kinuna ni Marcos.
Kellaat a nalagipda ni Julius a makiay-ay-ayam kadagiti kaarrubada nga ubbing iti ruar. Sellag ita. Pinaawaganda ni Julius.
Inamiris ni Marcos dagiti pungopunguan ken dapan ni Julius. Adda met babassit a nalabaga iti tengnga dagiti pungopunguan ken dapan ti ubing.
“Ania, barok, nakariknaka iti sakit ditoy itay bigbigat?” Intudo ni Marcos ti tengnga ti kanawan a pungopunguan ti ubing.
“Wen, uliteg. Ngem apagbiit laeng,” insungbat ti ubing.
Iti parbangon, naitagtagainep ni Salvino ti Maestro. Agpatpatangda kampay idi iti sirok ti maysa a kayo. Ipakpakita ni Salvino dagiti pungopunguanna iti Maestro.
Kinuna ti Maestro, “Salvino, no dinak pampanunotenen ket lipatennakon, agsardengen nga agut-ot dagita pungopunguan ken dapanmo. Ngem no pampanunotennakto latta, agbalinto a kastoy dagita pungopunguam.”
Impakita ti Maestro dagiti pungopunguanna. Sadiwa pay laeng dagiti sugat a nagnaan dagiti lansa ngem nagsardengdan nga agdara.
Kayat a saludsoden ni Salvino no ania dagiti pagsayaatan nga ited dagiti sugat iti pungopunguanna. Ngem sakbay a makapagsao, sinungbatanen ti Maestro.
“Agbalinka a mangngagas,” kinuna ti Maestro. “Amin a sagidem a masakit, umimbagda a dagus. Kiddawem laeng iti naganko.”
Kalpasanna, binendisionan ti Maestro ni Salvino.
Ket ditan a nakariing ni Salvino.
NAITANEM ti Maestro iti rukib nga asideg laeng iti nakailansaanna. Tallo a grupo dagiti soldado ti agsisinnublat nga agbantay iti tanem iti aldaw ken rabii. Yamakda ngamin no adda pasurot ti Maestro, wenno dagiti kabusor ti naud-udi, nga agpanggep a mangitalaw iti bangkay.
Manipud iti tengnga ti maikadua a rabii agingga iti bigat ti maikatlo nga aldaw a pannakaipumpon ti Maestro, batang ti grupo ni Salvino ti agbantay iti tanem.
Tapno saan a yepyepen ni Salvino, nagpagnapagna iti sango ti tanem. Idi mabannog, intugtugawna iti dakkel a bato. Dina napupuotan a nairidep a siiiggem iti gayangna.
Iti agalas tres ti parbangon, adda nangpitik iti kanigid a lapayagna. Nakigtot a nariing. Nakaturog gayam! Asino ti nangpitik iti lapayagna?
Nadlawna a matmaturog met dagiti kaduana iti asidegna. Iti adayo bassit, agpapatang ti tallo a bantay a nanglawlaw iti bassit a temtem.
Inwarasna pay ti panagkitana iti arubayan ti tanem. Awan ti nadlawna a karkarna. Idi tumangad iti tangatang, nakakita iti maysa a kasla dakkel a bituen a bumabbaba ken dumakdakkel. Nasdaaw.
Napartak ti panagpababa ti ipagarupna a bituen. Sakbay a naamirisna a saan a bituen dayta, nalasinna ti dua a tao a nakaranraniag a sarsarunuen ti ad-adu pay a nakaranraniag met.
Ket arig apagkirem, addadan iti batog ti tanem. Derederetso dagiti immuna a dua a limnek ken nagpukaw iti batog ti tanem idinto a dua pay ti nagdisso iti agsumbangir ti ruangan ti tanem. Nagpundo ti dadduma iti angin, iti batog a mismo ti tanem.
Kasla nagdisso ti init iti dayta a lugar iti karaniagna.
Nagriaw dagiti siririing a bantay a nakadlaw iti napasamak. Nariing ken natarimbangon dagiti matmaturog a kaduada. Agarup napurarda iti lawag nga aggapu iti tanem. Nagkullayawda idi makitada ti dua a lallaki a nagtakder iti agsumbangir ti ruangan ti tanem. Saggaysa dagitoy iti espada nga umap-apuy manipud putan agingga iti murdongda.
Ket idi tumangadda, ad-adda manen ti kullayawda idi makitada dagiti agtatapaw a lallaki iti ngatuen ti tanem. Adda amin armasda nga umap-apuy.
Ania pay, magsitarayen ti kinuada. Dagiti saan a makataray gapu ta binibineg ida ti nalaus a butengda, kimlebda lattan iti daga sada immudumod dagiti rupada dita.
Kasla nailansa met ni Salvino iti nagtugawanna a bato. Nabukirad dagiti mata ken agongna ken nakalawlawa ti ngangana a kumitkita kadagiti nakarangrangrang a parsua.
Nupay saan a nagkuti dagiti lallaki a nagtakder iti agsumbangir ti ruangan ti tanem, natulid ti dakkel a bato a rikep ti tanem. Ket naranraniag manen ti lawag nga aggapu iti nalukatan a tanem.
Madamdama bassit, nakita ni Salvino ti tallo a lallaki a rimmuar iti tanem. Nalasinna ti Maestro. Dina am-ammo dagiti dua a lallaki ngem agparparang a bayabay ti Maestro dagitoy. Adda met espadada ngem naikaluban ken naisukbit iti likudda.
Nagsabat dagiti mata da Salvino ken ti Maestro. Umis-isem ti Maestro ken dagiti kakaduana nga agturong iti ‘yanna. Kasla nagsardeng ti panagpitik ti puso ni Salvino iti nakitana.
Umis-isem latta ti Maestro ken dagiti kakaduana a nangmatmat ken ni Salvino idi agtaktakderdan iti sango ti naud-udi. Kasla nabalud ti dila ni Salvino. Ngem nariknana ti panagayus dagiti luana kadagiti pingping ken timidna.
“Kappia koma nga agnanayon ti adda kenka, Salvino,” kinuna ti Maestro. Imparabawna ti kanawan a dakulapna iti ulo ni Salvino sa timmangad ken nagkararag biit.
Nalapunos ni Salvino iti rag-o. Naruk-atan iti kasla pannakailansana iti bato.
Innala ti Maestro dagiti ima ni Salvino sa pinuyotanna dagiti pungopunguan daytoy. Ket nagbalinen a sugat dagiti sigud a nalabaga iti tengnga dagiti pungopunguan ni Salvino. Nagtedted ti dara kadagiti sugat.
“Manipud ita, nabendisionanen dagiti kaputotam, Salvino. Inkanto saraken ti inak ket ibagananto kenka dagiti aramidem,” kinuna ti Maestro.
Nagnan ti Maestro ken dagiti kakaduana nga umadayo. Madamdama, in-inut a nagpukawda. Idi taliawen ni Salvino dagiti lallaki iti ruangan ti tanem, nagpukawda metten. Kasta met dagiti lallaki nga agtatapaw iti batog ti tanem. Ket nagsubli ti ulimek iti dayta a lugar. Ngem nagtalinaed ti bileg a nangbalkot iti lugar.
Nabayag sakbay a nagsubli dagiti bantay a soldado. Nariknada ti naidumduma a bileg a nangbalkot iti lugar. Madamdama, nakaar-arimbangawdan.
Adda sumagmamano a nakaitured a simrek iti rukib. Nakitada nga awanen ti Maestro iti nakaipaiddaanna a bato. Idi laeng a naamirisda a madusada la ketdi iti ipapanaw ti impapanda a bangkay ti Maestro.
Nagsasaritaanda no ania ti istoria nga ireportda iti panguloda. Ket nagkaykaysaanda nga intalaw dagiti pasurot ti Maestro ti bangkay daytoy. Ireportda a nasurok a dua gasut nga armado a pasurot ti Maestro ti immay nangala iti bangkay ket awan ti naaramidanda.
Binedbedan ni Salvino dagiti pungopunguanna iti lupot tapno awan ti makadlaw kadagiti sugatna.
Idi makaawid ni Salvino iti balayda, kinitana dagiti pungopunguan ni Julius. Awan nagbaliwanda. Adda pay laeng dagiti babassit a nalabaga iti tengnga dagiti pungopunguan ti anakna.
Sinarita ni Salvino kadagiti kabbalayna dagiti napasamak iti nakaitaneman ti Maestro.
“Resureksion,” kinuna ni Marcos. “Ket gapu ta inikkannakan iti bileg nga agagas, ituloymo ti imbatina a trabaho.”
“Ita, kasano a tungpalek ti bilinna a sarakek ti inana? Adu ti makaammo a soldadoak ti Roma. Awan la ketdi ti mayat a mangitudo iti pakasarakak iti inana,” kinuna ni Salvino.
“Siak ti makaammo iti dayta,” kinuna ni Marcos. “Iti negosiok, adda la ketdi pasurot ti Maestro nga umay gumatang iti tagilakok. Mabalinko a yarasaas a kayatko met ti dumngeg kadagiti pannursuroda.”
MAYSA a rabii, inyawid ni Marcos ni Esteban, maysa a pasurot ti Maestro. Nupay sinaritan ni Marcos ken ni Esteban dagiti ammona a mainaig iti kaamaanda iti Maestro, sinarita latta ni Salvino dagiti padasna idiay Golgota ken iti nakaitaneman ti Maestro.
Inruar ni Claudia ti bimmato a dara. Inamiris ni Esteban daytoy. “Masapul a makita ni Ina Maria daytoy,” kinunana. “Urnosek ti panagkitayo.”
Nagsubli ni Esteban iti maikadua a rabii. Inkuyogna da Salvino ken Marcos a mapan iti pagnaedan ti ina ti Maestro. Intugot ni Salvino ti bimmato a dara ti Maestro. Inkargana daytoy iti lalat a bag.
Napanda iti balay ti maysa a pasurot ti Maestro nga agnagan iti Juan. Sadiay, nadanonda ni Ina Maria ken sumagmamano a lallaki ken babbai a pasurot ti Maestro.
Adda nakailasin ken ni Salvino a kameng dagiti soldado ti Roma. Nagdanagda. Ngem pinagkalma ida ti ina ti Maestro.
“Anakko, ipakitam kadakuada dagita pungopunguam,” kiniddaw ni Ina Maria ken ni Salvino.
Inikkat ni Salvino dagiti bedbed dagiti pungopunguanna. Nagparang dagiti sugat a kas kadakkel dagiti sugat dagiti pungopunguan ti Maestro.
Inamirisda dagiti sugat ni Salvino. Nasdaawda amin iti nakitada.
Simmangpet ti sangapulo a disipulo ti Maestro. Inyam-ammo ni Estaban da Salvino ken Marcos kadakuada. Anian a ragsak dagiti disipulo idi makitada dagiti sugat ni Salvino. Ammoda lattan a milagro ti Maestro daytoy.
Kamaudiananna, manipud iti awitna a bag, inruar ni Salvino ti bimmato a dara iti kalis.
“Itedko kenka daytoy, Ina Maria,” kinunana. “Ad-adda nga ammom dagiti pagpaayanna.” Inyawatna ti kalis iti ina ti Maestro.
Napalua ni Ina Maria idi matmatanna ti bimmato a dara iti kalis. Nagkararag. Kalpasanna, kinunana, “Adda bilin ti Langit nga immay kaniak. Buraken daytoy bato agingga iti kas kapino ti darat. Kalpasanna, ukriten ti kudil ti pasurot sa italmeg ti maysa a maregmeg iti ukrit. Malunag ti maregmeg apaman a mailaok iti dara ti pasurot ket agbalinen daytoy a paset ti darana.”
Babaen ti almires, linebbekda ti bimmato a dara ti Maestro agingga a kas kapinon ti darat.
Pinadayawanda ni Marcos nga umuna a maikkan iti maregmeg ti dara. Inukrit ni Marcos ti kanawan a takiagna. Nangpidut iti maysa a maregmeg ti dara sa intalmegna daytoy iti ukrit.
“Kas ken ni kayongmo a Salvino ken ni kaanakam a Julius, agtartaray metten ti dara ni anakko a Jesus iti bagim,” kinuna ni Ina Maria ken ni Marcos. “Ket tawidento dagiti kaputotam dayta a dara ingganat’ inggana.”
Napalua ni Marcos iti ragsakna. Nagyaman iti ina ti Maestro.
Simmaruno ti sangapulo a disipulo a naikkan iti maregmeg ti dara ti Maestro nga intalmegda met kadagiti inukritda a takiagda. Naikkanda amin, malaksid iti ina ti Maestro, nga adda iti dayta a balay.
“Nakaad-adu ti maregmeg a nagbalinan ti dara ti anakko,” kinuna ni Ina Maria. “Ngem kurangto pay la dagitoy nga agpaay kadagiti agbalinto nga adalanyo. Ngem mabalinkonto latta a nayonan ti darana iti darak gapu ta siak ngarud ti inana.”
Nangikabil ni Ina Maria iti sangkapirit a maregmeg ti dara ti Maestro iti kalis. Kalpasanna, tinudokna ti murdong ti tammudona sa impatedtedna ti darana iti kalis.
“Matmatanyo,” kinunana kadagiti pasurot ti Maestro.
Anian ti siddaawda idi makitada a nalunag dagiti maregmeg ti dara ti Maestro ket nagbalin manen a sadiwa ken umadu. Sibibiag manen ti dara.
Napartak ti panagadu ti dara iti kalis. Madamdama bassit, napunnon ti kalis iti dara. Di nagbayag, nagbalay ti dara agingga a bimmato ti katangkenna.—O
(Immuna a naipablaak iti Bannawag iti Abril 21, 2014 a bilang.)
