Agsagsaganan ti gobierno probinsial ti La Union para iti panagbabakasion iti Semana Santa.
Imbilin ni Gov. Raphaelle Veronica “Rafy” Ortega-David ti naan-anay a panagalerto ti Provincial Disaster Risk Reduction and Management Office (PDRRMO) ken ti Provincial Health Office (PHO) tapno masigurado ti kinatalged dagiti agbibiahe ken bisita iti probinsia.
“Ma-deploy dagiti personnel-tayo kadagiti kangrunaan a lugar tapno masigurado ti kinatalged ken seguridad dagiti bisita a manamnama nga agdudupudop iti probinsiatayo tapno agbakasionda iti Holy Week, saan laeng a kadagiti nalatak a destinasion dagiti turista no di pay ket kadagiti simbaantayo,” kinunana.
Naisaganan ti PDRRMO dagiti gamigam ken kasapulan a pag-rescue ken napagsasaritaan dagiti plano para iti emergency operations.
Red tide, naduktalan kadagiti baybay ti Bolinao, Anda
Nakikoordinarda kadagiti Municipal Disaster Risk Reduction and Management Office mainaig kadagiti kasapulan a panagsagana para iti “Oplan: Summer Vacation.”
Dua a team a buklen ti uppat a miembro ti maipakat kadagiti estratehiko a lokasion kas kadagiti lugar iti igid ti baybay.
I-deploy ti PHO dagiti emergency response services teams-na.
Maysa nga ambulansia, tallo a rescue pick-up truck, dua a rubber boat, maysa a jet ski, ken maysa a service vehicle ti maisagana a mapagtignay iti panangrespende kadagiti kaso ti emerhensia.
“I-monitor-tayo a nalaing dagiti aplaya ken karayantayo ta dagitoy ti kangrunaan a destinasion dagiti turista,” kinuna ni PDRRMO officer-in-charge Dr. Alvin Cruz.
Impalagip ni Ortega kadagiti tattao ti ekstra a panagannad nangruna no agdidigosda iti baybay kadagiti aplaya para iti natalged ken napnuan kaipapanan a bakasion.
Impalagipna pay kadagiti motorista a siguraduenda ti kinatalgedda ken agbalinda a responsable a drayber.
"Bayat ti panagpasiaryo iti La Union ken panagragragsakyo kadagiti aplaya ken karayantayo ita a kalgaw, idagadagko iti amin nga ipangpangrunada ti kinatalged. Aglangoykayo kadagiti naituding a lugar, suroten dagiti lokal nga advisories, ken kitane a natalgedkayo,” kinuna ni David.
“Zero casualty ti target-mi bayat ti Semana Santa,” kinuna ni Provincial Health Officer Dr. Hermenegildo Velasco.
Impalagip ni Ortega kadagiti umili a tungpalenda ti Anti-Disturbance Ordinance para iti Huebes Santo ken Biernes Santo tapno mataginayon ti kinasolemnidad dagiti narelihiosuan nga aktibidad.
Karaman kadagiti maiparit nga aktibidad dagiti konsierto, disko, karaoke, band performance show, gig, event, ken party. (Freddie Lazaro/MB)
