TACLOBAN CITY – Imbatad ni Rolan Kerwin Espinosa idi Biernes, Abril 11, a maysa a nangato ti posisionna a politiko ti adda iti likudan ti pananggandatda iti biagna bayat ti campaign rally idi Huebes.
Kinuna ni Espinosa, a kandidato a para mayor ti Albuera, Leyte, a nakita dagiti opisial iti Albuera dagiti polis manipud Ormoc City iti naggapuan dagiti putok.
Innayonna a nagaramat dagiti nangisikat iti biagna iti 5.56 Bushmaster Armalite nga addaan iti double-action a bala, a nangdangran met iti kabsatna a ni Mariel, ti running mate-na, ken ti anak ti maysa kadagiti kandidatona a para konsehal.
“Sapay koma ta asikasuen ni Mayor Lucy daytoy ta isu ti mayor ti Ormoc City. Damagenna koma kadagiti polisna no apay a nakadanonda ti Albuera— aglalo kenka Apo Kongresman Richard Gomez,” kinunana.
Marcos, inkalikagumna ti disiplina iti kalsada iti baet ti yaadu ti mapagpagteng a road rage
Talloda nga aglalaban a para mayor ti Albuera da Espinosa. Da agdama a Mayor Sixto dela Victoria ken ni Board Member Vince Rama a kayong ni Mayor Gomez dagiti kalabanna.
Imbatad ni Espinosa a ti putok ti paltog ket naggapu iti banda a yan ti maysa nga assistant district engineer ti Department of Public Works and Highways.
“Anian a pannakairanranana nga addada sadiay, ken damagko a liquidator dagitoy idi panawen ni (President) Duterte).”
Kinuna pay ni Espinosa nga adda sadiay ni Police Col. Reydante Ariza, police director ti Ormoc City, pakairamanan ti uppat pay a polis.
“Awan ti pagsuspetsaak. Bay-antayo ti polisia nga agimbestigar,” kinunana.
Imbatad ni Espinosa nga ituloyna ti agkampania ken mangipila iti kaso kontra kadagiti mayat a mangisikat kenkuana.
Dimmawat iti Commission on Elections iti seguridad ken umanamong a maikabil ti Albuera iti kontrol ti Comelec gapu kadagiti mapapati a mabaybayadan a polis.
Segun met iti Police Regional Office-8, tenggeldan dagiti persons of interest iti nasao nga insidente. Ngem kinuestionaran ni Espinosa no apay a naipan dagiti persons of interest iti PRO-8 headquarters sadiay Palo, Leyte imbes koma nga iti Albuera Police Station.
Kiniddawna nga awan koma ti mapasamak a whitewashing ken indawatna ken ni Presidente Ferdinand R. Marcos Jr. ken ti polisia a patas ti isayangkatda nga imbestigasion.
(Marie Tonette Marticio/Manila Bulletin)
