Nagpositibo iti red tide toxin dagiti shellfish manipud kadagiti coastal water ti Bolinao ken Anda iti Pangasinan, segun iti Bureau of Fisheries and Aquatic Resources (BFAR)-Ilocos Region.
"Kas pammakdaar, mabalakadan dagiti maseknan a local government unit a bagaanda dagiti market inspectors, quarantine officers, ken administrators a mangkiddaw kadagiti aglaklako iti auxiliary invoice manipud iti point of origin wenno local transport permit nga inted ti BFAR para iti amin nga ikan ken fishery products agraman dagiti seashell a naidiskarga ken nailako tapno masigurado a saan a naggapu kadagiti lugar a positibo iti paralytic shellfish poisoning,” kinuna ni Direktor ti BFAR-Ilocos Region Rosario Segundina Gaerlan iti waragawag nga inruarna idi Abril 10.
Inlawlawag ti BFAR nga agtalinaed a natalged a para taraon dagiti ikan, pusit, rasa, ken pasayan no la ketdi presko, nasayaat ti pannakadalusda, ken nasayaat ti pannakalutoda.
Mapakdaaran ti publiko a saan nga agala, aglako, wenno mangan iti ania man a shellfish wenno aramang manipud kadagiti naapektaran a lugar tapno maliklikan ti paralytic shellfish poisoning.
Garlic festival ti Ilocos Norte, paratignay iti ad-adu pay a mannalon, negosiante
Kinuna ni Municipal Agriculturist ti Anda Elizabeth Tomas, iti interbiu idi Abril 11, a nangipasdekda kadagiti checkpoint iti rangtay ti Anda tapno ag-monitor-da iti 24 nga oras iti inaldaw.
“Ti personnel in-charge iti checkpoint ti mangsukimat ken palubosanna laeng dagiti seafood products nga addaan auxiliary invoice a maibiahe iti ruar ti ili ken lokal a travel permit para kadagiti produkto a sumrek iti Anda,” kinunana ni Tomas.
Nainget ti pannakaiparit ti panaglako wenno panagibiahe kadagiti shellfish manipud kadagiti lokal nga aplaya.
Maballaagan dagiti aglabsing para iti umuna a panaglabsing; dagiti maulit-ulit a panaglabsing ket agresulta iti pannakakompiskar ken pannakaibelleng dagiti shellfish a lakoda. (Hilda Austria/Philippine News Agency)
