Ipaay ti GUMIL Filipinas (GF), gunglo dagiti mannurat nga Ilokano iti Filipinas ken ballasiw-taaw, ti 2025 Pedro Bucaneg Award ken ni Danilo A. Bautista ti Guimod Sur, San Juan Ilocos Sur, ken 2025 Pamulinawen Award ken ni Virgilio D. Domaloy (Mayo 23, 1952-Hunio 1, 2023) ti Agat, Sison, Pangasinan.
Maipaay ken ni Bautista ti kangatuan a pammadayaw nga ipapaay ti GF kadagiti mannurat nga Ilokano gapu iti iti dakkel a kontribusionna iti agtultuloy a pannakapabaknang ti literatura ni Ilokano babaen dagiti adu a sinuratna a nobela, sarita, daniw, ken salaysay a naipablaak iti nadumaduma a magasin ken libro ken adu kadagitoy ti nangab-abak iti salip; gapu iti napinget a panangitandudona iti tignay-GUMIL, nangruna kadagiti programa ken proyekto a mangidur-as iti panagsurat ken kadagiti sinurat iti bukod a pagsasao babaen ti aktibo a partisipasion, suportana ken panagbalinna a lektiurer kadagiti nadumaduma a komperensia, seminar ken workshop iti literatura Ilokana; ken gapu iti pagwadan nga ayatna a mangpatan-ay iti Literatura Ilokana babaen ti pannakipagbuangay ken panagbalinna a pangulo nga editor ti magasin nga Ariwanas a nangted kadagiti mannurat nga Ilokano, bangolan ken agdadamo, iti nayon a tay-ak a pagipablaakan kadagiti sinuratda.
Maipaay met iti daydi Dios-ti-aluadna a Virgilio Domaloy ti kangatuan a pammadayaw nga ipapaay ti GF kadagiti pimmusayen a mannurat nga Ilokano gapu iti dakkel a kontribusionna iti agtultuloy a pannakapabaknang ti literatura ni Ilokano babaen dagiti adu a sinuratna a sarita, daniw, ken salaysay, sumagmamano kadagitoy ti nakagun-od iti pammadayaw kadagiti salip, a nangipeksaanna iti naidumduma a panirigan ken panangipategna iti kultura ni Ilokano iti Amianan ken iti Cordillera a nagbaniagaan dagiti tugot ken kararuana iti kallikud a panawen; ken gapu iti napinget a panangitandudona iti tignay-GUMIL, nangruna kadagiti programa ken proyekto a mangidur-as iti panagsurat, bayat ti aktibo a panagakemna a kas kameng ken iti panangannongna iti nadumaduma a pagtakeman iti GUMIL Filipinas ken GUMIL Pangasinan.
Mayawat dagiti nasao a pammadayaw iti Rabii ti Pammadayaw iti Dap-ayan 2025: Maika-57 a Nailian a Kombension Dagiti Mannurat nga Ilokano inton Abril 26-27, 2025 a maangay iti Santa Teresita, Cagayan.
