Idagdagadag ni Deputy Speaker Camille Villar iti gobierno ti pannakayimplementar dagiti nailasin a program a para iti mental health wenno salun-at ti panunot kadagiti pagadalan kas paset ti komprehensibo nga estratehia tapno malapdan ti bullying ken maitandudo ti pagimbagan dagiti estudiante.
Impaganetget ni Villar ti madagdagus a kasapulan a masalakniban ti salun-at ti panunot dagiti agad-adal, nga intudona a ti peer pressure wenno panangpilit dagiti kapatadanda ken diskriminasion dagiti kangrunaan a makagapu iti bullying kadagiti pagadalan.
“Napateg unay a naurnos ti kasasaad ti panagpanunot dagiti estudiante,” kinuna ni Villar. “Ti mental wellness ket tulbek ti pannakasursuro ken masakbayanda."
Para iti daytoy a panggep, insingasing ni Villar ti panangyempleo iti ad-adu pay a guidance counselor kadagiti pagadalan tapno masigurado ti regular a konsultasion ken panangamiris iti salun-at ti panunot. Inyunay-unayna pay ti pannakasapul a mapasayaat ti pannakagun-od iti therapy ken serbisio ti salun-at ti panunot kadagiti sistema ti pagadalan ken iti lebel ti komunidad.
Mayor ti Valenzuela, inyendorsona ti kandidatura ni Camille Villar iti kinasenador
Sipud pay, nangrunan nga adbokasia ni Villar dagiti panakareporma ti salun-at ti panunot, partikular iti sektor ti edukasion. Idi 2023, nangipila iti House Resolution No. 900, a nangidagadag iti kadagiti komite ti salun-at ken komite ti basic education iti Kamara tapno mangimbestigae iti agdama a kasasaad ti salun-at ti isip iti entero a pagilian, nga addaan iti espesial a pokus iti sistema ti edukasion.
Kas paset ti lehislatibo nga agenda-na, impila ni Villar ti House Bill No. 10933, nga am-ammo a kas Teacher’s Mental Health and Wellness Act, a mangikalikagum a mangipaay kadagiti edukador iti komprehensibo a mental ken emosional a suporta. Impilana pay ti House Bill No. 10934, a mangikalikagum a mairaman dagiti kondision ti salun-at ti panunot iti benefit packages ti PhilHealth.
Kinuna ti mammanday-linteg ti Las Piñas, nga agngayangay a para Senador iti nasional nga eleksion inton Mayo 12, a ti panangpatibker iti sistema ti edukasion ket maysa a panuli a bato ti panagkampaniana.
“Mabalin a balbaliwan ti edukasion ti biag ken kagimongan,” kinunana. "Ngem tapno agballigi daytoy, masapul nga sisasagana a mental ken emosional dagiti estudiante ken mannursurotayo. Nasken a proactive ti gobierno."
Indagadag ni Villar ti “whole-of-government approach” iti panangtaming iti krisis ti salun-at ti panunot, a kunana a kasapulan dagiti baro ken moderno nga estratehia tapno maitunos kadagiti agbaliwbaliw a karit a sangsanguen dagiti estudiante ken edukador.
