Impasingked ni kandidato a para senador Camille Villar ti panangikomitna iti bagina para iti pagimbagan ken pannakasalaknib dagiti Overseas Filipino Workers (OFWs) a dakkel ti akem ken kontribusionda iti ibabangon ken idudur-as ti ekonomia ti pagilian.
Iti panagsaritana iti sanguanan dagiti lokal a lider ken pannakabagi dagiti sektor iti probinsia ti Quezon iti ngudo ti lawas, imbinglay ni Villar no kasano nga impangpangruna ti pamiliana, iti unos ti nabayagen a panagserbida iti publiko, dagiti kasapulan dagiti OFW. Dinakamatna ditoy kas pagarigan dagiti impaayda kadagiti mangmangged a Filipino iti ballasiw-taaw kadagiti naglabas a tawen kas iti legal aid, repatriation support, livelihood assistance, ken hotline a nairanta a para laeng kadagiti OFW.
“Dagiti kailiantayo nga OFW ti duri ti adu a pamilia a Filipino ken isuda ti natibker nga adigi ti ekonomiatayo. Rumbeng laeng nga ipaayan ti gobierno ida iti naan-anay a suporta,” kinuna ni Villar.
Ni Villar, a nagserbi iti maika-18 a Kongreso, ti maysa kadagiti mammanday-linteg a nangsuportar iti pannakaipasa ti Republic Act No. 11641 a nangbukel iti Department of Migrant Workers. Ti ahensia ti mangimaton iti pannakasalaknib ken pagimbagan dagiti OFW iti entero a lubong.
Mayor ti Valenzuela, inyendorsona ti kandidatura ni Camille Villar iti kinasenador
Itoy nga ibibisita ni Villar iti Quezon, nagyaman ken ni Gobernador Helen Tan ken kadagiti dadduma pay a lokal nga opisial gapu iti suportada kenkuana ken gapu intedda a gundaway kenkuana a makilangen iti personal dagiti taga-Quezon.
Malaksid iti panangitandudona kadagiti OFW, impalagip ni Villar ti kinapateg ti pannakaidur-as ti rural development. Inlungalongna a yad-addatayo koma ti agpuonan para iti agrikultura ken impraestruktura ta kunana a masapul ti pannakapataud ti ad-adu a gundaway kadagiti away.
"Ti agrikultura ken impraestruktura ti tulbek iti panagrang-ay dagiti komunidad iti away. Dagitoy ti pundasion ti nasaknap a panagdur-as," kinunana.
Kas maysa a millennial leader, kinuna ni Villar a panggepna ti mangidanon kadagiti baro a kapanunotan ken moderno a solusion iti gobierno. “Kayatko ti tumulong a mangbangon iti nasaysayaat a masakbayan para iti tunggal Filipino babaen dagiti pagalagadan a kabaruanan, mannakipagrikna, ken naibatay kadagiti pudno a kasapulan,” innayonna.
