Dua nga agpapaay iti Departamento ti Edukasion (DepEd), maysa a panglakayen ti Saksi ni Jehova, maysa nga OFW, ken maysa polis dagiti nangabak a mannurat iti umuna a Salip iti Sarita ti Norberto D. Bumanglag Jr. Literary Awards (Bumanglag Awards).
Indauluan ni Michael Cordero Corpuz, mannursuro iti Sta. Rosa National High School iti Sarrat, Ilocos Norte dagiti nangabak itoy a salip babaen ti saritana a “Ti Bubon iti San Secundus” a nangyalat iti Umuna a Gunggona.
Kadua ni Corpuz a nangabak da Florencio M. Bayuga ti Santa Maria, Pangasinan; Michelle Gamueda-Rafanan ti Purok Dos, Parioc 1st, Candon City, Ilocos Sur; Minerva Corpuz Butac Orteza ti Capagaran, Allacapan, Cagayan, ken Archie C. Anipot ti Capangpangan, Vigan City, Ilocos Sur.
Pinangabak ni F.M. Bayuga ti saritana a “Konsiensia” iti Maika-2 a Gunggona idinto a pinangabak met ni Michelle Gamueda-Rafanan ti saritana a “Panagpasungad” iti Maika-3 a Gunggona.
Famajilan, Grand Prize Winner iti Salip iti Daniw ti 7th Gabriela Prize
Iti pagannurotan ti salip, nadakamat a tallo laeng ti maipaayan iti gunggona, ngem nailanad a mabalin ketdi dagiti hurado ti mangparnuay iti nayon a gunggona no mapagnunumuanda nga adda nayon a maikari a mangabak. Gapu iti daytoy, inkeddeng dagiti hurado ti nangted iti dua pay a gunggona a naipaay kada Minerva Butac Orteza (Maika-4 a Gunggona) babaen ti saritana a “Dagiti Murkat iti Disierto," ken Archie C. Anipot (Maika-5 a Gunggona) babaen ti saritana nga “Anniniwan ti Bulan.”
Dagiti naghurado: Daniel L. Nesperos (pangulo), Cles B. Rambaud, (kameng), ken Juan Al. Asuncion (kameng).
Inisponsoran ni mannurat ti Bannawag ken 2020 Pedro Bucaneg Awardee Norberto D. Bumanglag Jr. ti San Nicolas, Ilocos Norte ti salip. Nagpaay met a Secretariat ti Bannawag (nga imbagian ni Juan Al. Asuncion kas chair) ken GUMIL Ilocos Norte (nga imbagian met ni Daniel L. Nesperos).
Nalukatan ti salip idi Oktubre 20, 2024 ken naggibus idi Marso 15, 2025. Agpaay laeng ti salip kadagiti agdadamo a mannurat iti Ilokano. Iti daytoy a salip, maibilang nga agdadamo ti mannurat no awan pay saritana a naipablaak iti Bannawag; no adda man, saan a nasursurok ngem lima agingga iti Oktubre 16-31, 2024 a bilang ti nasao a magasin.
Nayanak ni M.C. Corpuz iti Brgy. 17, Sarrat, Ilocos Norte. Nagturpos iti Bachelor of Arts in English Literature iti Divine Word College of Laoag. Nagpaay a kas instructor iti Mariano Marcos State University, College of Arts and Sciences iti unos ti sangapulo a tawen. Iti agdama, mannursuro iti Sta. Rosa National High School.
Maysa a balo ken agtawenen iti 79 ni F. M. Bayuga ti 38 National Road, Poblacion East, Santa Maria, Pangasinan. Inladawanna ti bagina a kas panglakayen ti Saksi ni Jehova.
Dati a mangisursuro ni M.G. Rafanan iti elementaria iti St. Joseph’s Institute, Inc., Candon City ngem mangisursuro itan iti maysa a public school iti siudad ti Candon. Fellow iti Pasnaan 2. Anak da Pedro Gamueda Sr. ken Feliciana Galdones-Gamueda. Nayasawa ken ni Amado G. Rafanan, addaandan iti 2 nga annak, da: Michael Jester and Michaella.
Agtawen met iti tallopulo ket tallo ni Minaerva Butac Orteza. Isu ti maikadua a bunga da Sadiri Orteza ken daydi Dios ti aluadna a Madelyn Butac. Addaan iti maysa nga anak, a lalaki. Agdama a domestic helper iti pagilian a Malaysia.
Nagturpos ni Archie Castillo Anipot iti Bachelor of Science in Civil Engineering idi 1998 iti University of Northern Philippines iti Siudad ti Vigan. Simrek iti PNP idi 2001. Police Lieutenant ken agdama a Deputy Chief of Police ti San Vicente, Ilocos Sur. (Juan Al. Asuncion)
