Ni Dimple Garcia Famajilan ti Galimuyod, Ilocos Sur, ti nangyalat iti Grand Prize (Naindaklan a Premio) iti Salip iti Daniw ti Maika-7 a Gabriela Prize/Premio Gabriela (2024-2025).
Pinangabak ni Famajilan ti daniwna a "Silaw ti Bulan" manipud iti 16 a daniw a naisalip. Taga-Sitio Bao-yan, McKinley, Galimuyod, Ilocos Sur ken agtawen iti duapulo ket tallo, mangisursuro iti agdama iti Ilocos Sur Polytechnic State College-Main Campus iti Siudad ti Candon, a nagturposanna iti Edukasion kas cum laude. Fellow ti Daniw iti Maika-13 (2024) nga Edision ti Pasnaan, ti Workshop Dagiti Mannurat nga Ilokano a tinawen nga isaysayangkat ti GUMIL Filipinas. Agsursurat iti daniw nga Ilokano, English, ken Tagalog, nakaipablaaken iti dandaniw ken ababa a sarita iti Bannawag Magazine, Mountain Beacon (online), kdp.
Napili met ti daniw nga "Agtiltiliwak iti Rimat ti Layap" ni Johmar Rosario Alvarez a kas Finalist/Runner-up. Premiado a piksionista ken mannaniw ni Alvarez a tubo ti Mabuttal East, Ballesteros, Cagayan, ngem agnaeden iti Ontario, Canada kas imigrante. Agdama a product lister iti Maxx Liquidation Marketplace. Kaingungotna ni dati a Jhonna Belle A. Clemente.
Dagiti nagpaay a hurado: Neyo Mario E. Valdez, mannaniw, piksionista, nobelista ti Narvacan, Ilocos Sur, chairman; Ma. Lourdes L. Opinaldo, mannaniw, piksionista, dibuhista ti Balaoan, La Union; ken Leonardo D. Tejano, mannaniw, edukador, eskolar ti lengguahe ken kultura nga Ilokano ti Paoay, Ilocos Norte; kamkameng.
Corpuz, indauluanna dagiti nangabak iti Salip iti Sarita 2025 ti Bumanglag Awards
Ti Imnas & Iway Publications, maysa nga independiente nga small press nga agipabpablaak iti zine, chapbook, ken libro nga Ilokano, ti mangtartarawidwid iti Gabriela Prize.
Padaanan ti pannakalukat ti sumaruno a salip para iti 8th Gabriela Prize (2025-2026). Maipablaak ti awis ken pagannurotan ti salip iti mabiit.
---------------------
Dagiti dadduma pay naisalip a daniw iti 7th Gabriela Prize:
* Ayat a Bimmulong
* Sinadag
* An-annong
* Kuddot iti Puso
* Arbis
* Abuyoka't Kabakiran, Yan Bala a Bumegbeggang
* (Bukaneganiw #1): “TA KASTALAT’ BIAG”
* Diay Rabaw ti Lawlaw
* Tallo a Daniw: Bantay, Dara, Dadael
* Gradas
* Panungpalan ti Ebolusion
* Urayem ti Batangmo, Kaka Tanud!
* Singgalut ti Singsing
* Ti Mannaniw
