Patien ti maysa nga abogado-legislator nga addaan itan ti tri-committee (tri-comm) ti Kamara iti "probable cause" a mangirekomendar iti panagtignay manipud kadagiti ahensia ti gobierno kontra ken ni dati a presidential spokesperson Harry Roque.
Iti maysa nga interbiu idi lawasna, kinuna ni Batangas 2nd district Rep. Gerville Luistro a dagiti banag nga imbutaktak ni vlogger Vicente "Pebbles" Cunanan bayat ti tri-comm hearing idi Abril 8 ket umdas unayen a pagbatayan tapno maipila ti reklamo kontra ken ni Roque.
"Babaen ti panagusarna iti internet, ginandatna a pagparangen nga agus-usar a talaga iti cocaine ti Presidente (Marcos) idinto a babaen ti testimonia ni Pebbles Cunanan ken ti dadduma pay a resources ti DOJ (Department of Justice) ken dagiti ahensia ti gobierno, sinertipikaranda a peke daytoy ken awanan kinaagpaysuananna," kinuna ni Luistro.
"Isu a no para iti panagipila, panagkunak ket sobra pay ketdin iti probable cause 'diay kaadu ti ebidensia a naaladan," inpaganetgetna.
Mayor ti Valenzuela, inyendorsona ti kandidatura ni Camille Villar iti kinasenador
Kabayatan ti public hearing idi Abril 8 iti Kamara, nangidatag ni Cunanan iti affidavit a nangakusaranna ken ni Roque a mangidadaulo iti plano a marippuog ti administrasion ni Presidente Marcos babaen ti panangusar iti makunkuna a "polvoron video."
Arigna nga imbaga ni Cunanan a ni Roque, a no mano a bulanen nga aglemlemmeng kadagiti autoridad ti Filipinas, ti nagtaudan ti nasao a viral video, a maipagarup a nakaipakitaan ken ni Presidente Marcos nga agus-usar iti cocaine--maysa a powdery substance.
Segun kadagiti lokal nga autoridad, peke ti video.
Kinuna pay ni Cunanan nga impasindayag ni Roque kenkuana ken kadagiti dadduma pay a vlogger bayat ti maysa a miting idiay Hong Kong idi Hulio 7, 2024, nga isu (Roque) ket nalaing a mangrippuog iti gobierno.
Naipubliko ti "polvoron video" iti umuna a gundaway babaen ken ni Roque a mismo, kinuna ni Cunanan, bayat ti Maisug Rally a naangay iti Vancouver, Canada idi Hulio 20, 2024–-maysa laeng nga aldaw sakbay ti maikatlo nga State of the Nation Address (SONA) ni Marcos.
Panggep ti tri-comm inquiry, a kangrunaan a pakairamanan dagiti vlogger ken social media personalities, ti mangammo iti gapu ti di agsarday a panagsaknap dagiti peke a damag ken disinformation iti online.
Mabalin nga irekomendar ti special joint panel ti panagtignay ti sanga ti ehekutibo maibatay kadagiti natakuatan iti imbestigasionda. (Ellson Quismorio/MANILA BULLETIN)
