"Dikay' agbalin a kamotit."
Daytoy ti palagip ni Presidente Ferdinand Marcos Jr. kadagiti motorista idinto a kinondenarna dagiti kallabes nga agresibo a kababalin iti kalsada a nagresulta iti kinaranggas ken ipapatay.
Iti kallabes a vlog ti presidente, insennaayna ti inawaganna a makariribuk a kultura ti machismo ken kinadang-as kadagiti motorista.
"Nagtutured ti amin, nagpapangas ti amin. Ania kadin daytoy a kultura ti kinatangig iti kalsada?" kinunana.
Nangabak iti 1st Bumanglag Awards, mapadayawan iti Dap-ayan 2025 ti GF
"Ania ti mapaspasamak kadatayo a kasla gagangay laengen daytoy a kita ti komprontasion ken kinaranggas?" innayonna.
Kinuna ni Marcos a nasken a saysayaaten dagiti motorista ti kababalinda ken sursuruenda ti aganus. Impalagipna kadakuada a ti panagmaneho ket addaan iti responsibilidad, saan nga entitlement wenno kinapalangguad.
"Dikay' agbalin a kamotit," kinunana. Maysa nga slang wenno nakairuaman a pangawag ti "kamote" wenno kamotig kadagiti awan manaknakemna ken awanan disiplina a drayber.
"Maysa a pribilehio ti lisensia iti panagmaneho, saan a karbengan," innayonna.
"Datayo met la ken ti pamiliatayo ti mapukawan no maisagmaktayo ta pagturayentayo ti pungtot iti uray apagdarikmat laeng," kinunana pay.
"Pagpasensiaanyo laengen, bay-anyo lattan, ania kadi ti mapukaw kadatayo, aya. Maysa a segundo, lima a segundo, 20 a segundo--palabsenyo lattan, diyo latta patolan idan," kinuna.
"Masapul nga urnosen ti tunggal maysa ti kababalinna no agmaneho ken yat-atiddogna ti anusna," innayonna.
Indawat a ni Marcos kadagiti tattao a makaimatang iti road rage a saanda koma a pagay-ayatan ti kinaranggas.
"Aganawatayo, imbes nga agi-video. Tratuentayo daytoy kas pagrebbengantayo a mangtaginayon iti talna iti aglawlawtayo," kinunana. (Argyll Cyrus Geducos/MB)
