Pimmigsa ti kandidatura ni Diputado ti Las Piñas City Camille Villar kas senador kalpasan a nagun-odna ti suporta ti One Cebu, ti kangrunaan a Partido ti probinsia, nga idadauluan ni Gobernador Gwendolyn Garcia.
Iti naangay a politikal a panagtataripnong idi napalabas a Mierkoles iti Cebu, pormal nga intag-ay ni Gobernador Garcia ti ima ni Villar, kas simbolo ti naan-anay a suporta ti partido. Ad-adda pay a napabileg ti suporta gapu iti kaadda ken panangsuportar ti amin a 31 a mayor iti babaen ti One Cebu a coalition, a nangpatibker iti takder ni Villar iti probinsia nga addaan iti adu a botante.
"Agyamanak, ken agpakumbabaak iti suporta ni Gov. Gwen Garcia ken dagiti mayor a nangabrasa kadakami,” kinuna ni Villar iti maysa nga statement. Impatalgedna met ti karina a mangsuportar iti probinsia babaen dagiti gannuat a mangparnuay iti panggedan, panangpapigsa kadagiti babbai, financial literacy, ken panangtulong kadagiti micro, small, and medium enterprises (MSMEs).
Ni Villar, a damona ti agkandidato a senador, ket kadua ti kabsatna, ni Mark Villar, nga agdama a senador, bayat ti panagkampaniana iti entero a Cebu ken dadduma pay a paset ti Rehion 7, a maawagan met iti Central Visayas. Segun iti Commission on Elections (COMELEC), agdagup iti 4,753,563 ti rehistrado a botante iti Rehion 7 a kualipikado a makipartisipar iti eleksion iti 2025. Ti met Cebu ti maibilang a sarikedked iti politika ti rehion ta addaan daytoy iti 3,702,363 a nairehistro a botante ken 9,443 a clustered precincts.
Marcos, inkalikagumna ti disiplina iti kalsada iti baet ti yaadu ti mapagpagteng a road rage
Babaen ti panangsuportar ti One Cebu, manamnama a pumigsa ti kandidatura ni Villar iti Visayas, a mangpabileg iti kampaniana iti entero a pagilian bayat nga umasudeg ti midterm elections.
