Mapadayawan dagiti mannurat a nangabak iti Umuna a Salip iti Sarita ti Norberto D. Bumanglag Literary Awards inton rabii ti Abril 26, Sabado, bayat ti Dap-ayan 2025: Nailian a Kombension Dagiti Mannurat nga Ilokano nga angayen ti GUMIL Filipinas iti ili ti Sta. Teresita, Cagayan.
Dagiti mapadayawan:
Umuna a Gunggona: Michael Cordero Corpuz, mannursuro iti Sta. Rosa National High School iti Sarrat, Ilocos Norte, babaen ti saritana a “Ti Bubon iti San Secundus.”
Maikadua, Florencio M. Bayuga ti Santa Maria, Pangasinan; babaen ti saritana a ”Konsiensia,”
Mayor ti Valenzuela, inyendorsona ti kandidatura ni Camille Villar iti kinasenador
Maikatlo, Michelle Gamueda-Rafanan ti Purok Dos, Parioc 1st, Candon City, Ilocos Sur; babaen ti sarita a “Panagpasungad,”
Maikapat, Minerva Corpuz Butac Orteza ti Capagaran, Allacapan, Cagayan, “Dagiti Murka iti Desierto,” ken
Maikalima, Archie C. Anipot ti Capangpangan, Vigan City, Ilocos Sur, “Anniniwan ti Bulan.”
Iti pagannurotan ti salip, nadakamat a tallo laeng ti maipaayan iti gunggona, ngem nailanad a mabalin ketdi dagiti hurado ti mangparnuay iti nayon a gunggona no mapagnunumuanda nga adda nayon a maikari a mangabak. Gapu iti daytoy, inkeddeng dagiti hurado ti nangted iti dua pay a gunggona a naipaay kada Minerva Butac Orteza ken Archie C. Anipot.
Dagiti naghurado: Daniel L. Nesperos (pangulo), Cles B. Rambaud, (kameng), ken Juan Al. Asuncion (kameng).
Inisponsoran ni mannurat ti Bannawag ken 2020 Pedro Bucaneg Awardee Norberto D. Bumanglag Jr. ti San Nicolas, Ilocos Norte ti salip. Nagpaay met a Secretariat ti Bannawag (nga imbagian ni Juan Al. Asuncion kas chair) ken GUMIL Ilocos Norte (nga imbagian met ni Daniel L. Nesperos).
Nalukatan ti salip idi Oktubre 20, 2024 ken naggibus idi Marso 15, 2025. Agpaay laeng ti salip kadagiti agdadamo a mannurat iti Ilokano. Iti daytoy a salip, maibilang nga agdadamo ti mannurat no awan pay saritana a naipablaak iti Bannawag; no adda man, saan a nasursurok ngem lima agingga iti Oktubre 16-31, 2024 a bilang ti nasao a magasin.
Naipasngay ni M.C. Corpuz iti Brgy. 17, Sarrat, Ilocos Norte. Fellow iti Pasnaan 11, workshop ti GUMIL Filipinas para kadagiti agdadamo a mannurat iti Ilokano. Nagturpos iti Bachelor of Arts in English Literature iti Divine Word College of Laoag. Nagpaay a kas instructor iti Mariano Marcos State University, College of Arts and Sciences iti uneg ti sangapulo a tawen. Iti agdama, mangisursuro iti Sta. Rosa National High School.
Maysa a balo ken agtawenen iti 79 ni F. M. Bayuga ti 38 National Road, Poblacion East, Santa Maria, Pangasinan. Inladawanna ti bagina a kas panglakayen ti Saksi ni Jehova.
Dati a mangisursuro ni M.G. Rafanan iti elementaria iti St. Joseph’s Institute, Inc., Candon City ngem mangisursuro itan iti maysa a public school iti siudad ti Candon, iti Cubcubbuot Elementary School. Fellow iti Pasnaan 2. Anak da Pedro Gamueda Sr. ken Feliciana Galdones-Gamueda. Nayasawa ken ni Amado G. Rafanan, addaandan iti 2 nga annak, da: Michael Jester and Michaella.
Agtawen met iti tallopulo ket tallo ni Minerva Butac Orteza, Fellow iti Pasnaan 13. Isu ti maikadua a bunga da Sadiri Orteza ken daydi Dios ti aluadna a Madelyn Butac. Addaan iti maysa nga anak a lalaki. Agdama a domestic helper iti pagilian a Malaysia.
Nagturpos ni Archie Castillo Anipot, Fellow iti Pasnaan 11, iti Bachelor of Science in Civil Engineering idi 1998 iti University of Northern Philippines iti Siudad ti Vigan. Simrek iti PNP idi 2001. Police Lieutenant ken agdama a Deputy Chief of Police ti San Vicente, Ilocos Sur. (Juan Al. Asuncion)
