Yalnag ti Urijah Publishing Enterprises ti Para Kiangan: Antolohia Dagiti Sarita ken Daniw ni Juan Ben Quimba, tubo ti Nueva Vizcaya, bayat ti Dap-ayan 2025: Nailian a Kombension Dagiti Mannurat nga Ilokano nga angayen ti GUMIL Filipinas iti ili ti Sta. Teresita, Cagayan inton Abril 26-27, 2025.
Kinuna ni Elizabeth M. Raquel, publisher ti Urijah Publishing Enterprises, a pakaidayawan ti Urijah ti panangipablaakna iti antolohia dagiti napili a gapuanan ni Apo Quimba, maysa kadagiti maibilang a teddek ti Literatura Ilokana.
Nagtaktakem a Managing Editor ti Bannawag, naipaay ken ni Apo Quimba ti Pedro Bucaneg Award idi 1993 manipud iti GUMIL Filipinas, ken ti Gawad Pambansang Alagad ni Balagtas (para iti piksion iti Ilokano) idi 2000 manipud iti Unyon ng Mga Manunulat sa Pilipinas (UMPIL).
Buklen ti Para Kiangan dagiti napili a sarita ken daniw ni Apo Quimba a kaaduanna ti rimmuar iti Bannawag bayat ti panagpaayna a kameng ti nasao a magasin. Mairaman iti libro dagiti nalatak a saritana a ti ”Para Kiangan,” ”Sabong ti Bagbag,” ken ti ”Katawa ti Kabalio.”
Libro ni Juan Ben Quimba, mayalnag iti Dap-ayan 2025 ti GUMIL Filipinas
Naaramat met a kas introduksion ti libro ti ”Juan Ben Quimba: Batonlagip ti Bascaran,” interbiu iti autor da Rambaud, Herman G. Tabin, Martin T. Rochina, ken Arnold Pascual Jose nga immuna a naipablaak iti dati a Rimat magasin.
Nagpaay ni Apo Quimba a kameng ti Bannawag kalpasan ti Maika-2 a Sangalubongan a Gubat. Managing Editor ti magasin idi aglusulos tapno agpaay a Technical Assistant ti Board of Directors ti Philippine Homesite (nagbalin idi agangay a People’s Homesite and Housing Corporation, nga itan, National Housing Authority).
Mismo a ti anakna, ni Dr. Olympia P. Quimba-Malanyaon, ti nangurnong kadagitoy a sinurat manipud kadagiti kopia ti Bannawag a naidulin iti National Library iti Manila.
Agpuskol ti libro iti 360 a panid iti rukod a 6” x 9” ken inedit ni Cles B. Rambaud, Editor ti Bannawag. Nagpaay met ni Juan Al. Asuncion, Managing Editor ti Bannawag, a book ken cover designer. Naaramat met nga akkub ti libro ti dibuho ni Charmaine A. Lingdas, dati nga staff ni Dr. Malanyaon idi agpapaay pay ti naud-udi iti Philippine General Hospital.
