Pinalubosanen ti Malakanyang dagiti opisial ti gobierno a sumarungkar iti Taiwan para iti ekonomiko ken negosio a panggep, ngem masapul a tungpalenda ti nainget a pagalagadan ken limitasion.
Maibatay iti Memorandum Circular (MC) No. 82 a pinirmaan ni Executive Secretary Lucas Bersamin itay Abril 15, ti laeng Presidente, Bise-Presidente, Sekretario ti Foreign Affairs, ken Sekretario ti National Defense ti maparitan a mapan iti Taiwan ken makiuman kadagiti pannakabagi ti Taiwan.
Binaliwan ti MC No. 82 ti damo a panangiparit idinto a mapalubosanen dagiti opisial ti gobierno a sumarungkar iti Taiwan tapno mangitandudo iti komersio, panagpuonan, ken panagtinnulong iti ekonomia, a pakairamanan dagiti benneg ti turismo, siensia ken teknolohia, ken edukasion.
Nupay kasta, kas maibatay iti memorandum, saan a maibilang nga opisial ti biaheda iti isasarungkarda iti Taiwan ta masapul nga agusarda iti gagangay a pasaporte, nga awan ti nakalanad nga opisial a tituloda, ken anamonganda a ti isasarungkarda iti Taiwan ket saan a maibilang nga opisial a pannakiuman kadagiti turayen ti Taiwan.
Balikatan Exercise ti Filipinas, US, marugian ita nga aldaw
Inkeddeng ti sirkular dagiti kondision iti panangawat kadagiti delegasion manipud iti Taiwan nga agkunkuna a mabalin nga awaten ti gobierno ti Filipinas dagiti delegasion manipud iti Taiwan tapno maitandudo ti negosio, panagpuonan ken panagtinnulong iti ekonomia, no la ket pakaammuanda ti Manila Economic and Cultural Office (MECO) ken ti Department of Foreign Affairs (DFA) 15 nga aldaw kalpasan ti isasarungkarda.
Impagunamgunam ti memorandum a masapul ti DFA clearance sakbay a mabukel ti nailanad a pannakitulag iti Taiwan. (Argyll Cyrus Geducos/Manila Bulletin//Lito Hilidon/Bannawag)
