Inkeddeng ti pre-trial chamber (PTC) ti International Criminal Court (ICC) nga awatenda amin a kita ti government ID dagiti kakabagian dagiti biktima ti drug war a kayatda ti makipaset iti pannakabista ni dati a presidente Rodrigo Duterte iti kasona a crimes against humanity of murder.
Iti pannakapalag-an iti identification rules, kaipapananna a saan a kedngan ti ICC a dagiti laeng pasaporte ken National ID dagiti maawat nga ID, kas nailanad iti 20-panid nga “Order on the conduct of confirmation proceedings" a naipaskil iti ICC website idi Abril 17.
Itay nabiit, inkalintegan dagiti abogado ni Duterte a dagiti laeng passport ken National ID ti rumbeng nga awaten ti PTC a kas pammaneknek iti kinaasino dagiti makipaset iti bista tapno babaen ti nainget a wagas, maliklikan ti misidentification, double-counting, ken pannakairaman dagiti palso a biktima.
Inanamongan ti Pre-Trial Chamber 1 (PTC-I) ti singasing ti ICC Registry a mairaman dagiti dadduma pay a government ID no awan ti pasaporte ken National ID kas pangbigbig kadagiti pamilia wenno kabagian dagiti biktima ti drug war.
Balikatan Exercise ti Filipinas, US, marugian ita nga aldaw
Malaksid iti pasaporte ken National ID, awaten ti PTC ti dadduma pay nga ID a kas iti Social Security System (SSS) card, Government Service Insurance System (GSIS) ID card wenno GSIS Unified Multi-Purpose ID (UMID) card, driver’s license, Professional Regulatory Commission (PRC) ID, Overseas Workers Welfare Administration (OWWA) ID wenno OWWA e-card, Department of Labor and Employment card (iDOLE card), voter's certification nga addaan iti dry seal, agraman firearms license.
Awaten pay ti PTC ti senior citizen ID card, persons with disabilities (PWD) ID card, National Bureau of Investigation (NBI) clearance, Alien Certificate of Registration ID card, PhilHealth ID card, airman’s license; Pag-IBIG Loyalty Card, Integrated Bar of the Philippines (IBP) ID card, Pantawid Pamilyang Pilipino Program (4Ps) ID card, ken school ID wenno certificate of enrolment/registration nga addaan iti ladawan ken dry seal ti pagadalan.
Mairaman ti government-issued nga ID kas iti Taxpayer Identification Number (TIN) card, postal ID card, barangay certification, Seaman’s Book (Seafarer’s Record Book), police clearance, Community Tax Certificate (sedula), Philippine Statistics Authority (PSA) marriage certificate, PSA birth certificate, solo parents ID card, ken baptismal certificate.
Kinuna ti ICC nga adalenda ti singasing ti Registry ti ICC a maawat kas proof of identity ti deklarasion a pinirmaan ti dua a saksi a mapakuyogan iti identity document dagiti saksi, a mangpasingked iti kinasiasino ti aplikante a kayatna ti makipaset iti bista.
Maangay ti confirmation of charges ni Duterte inton Septiembre 23 tapno ikeddengda no rumbeng nga ituloy ti ICC ti bista. (Raymund Antonio/Manila Bulletin//Lito Hilidon/Bannawag)
