Binuangay ti Philippine National Police (PNP) ti Joint Anti-Fake News Action Committee (JAFNAC) a mangtaming iti panagwaras ti fake news, nangruna kadagiti mainaig iti peace and order, ken seguridad ti pagilian.
Kinuna ni daulo ti PNP Gen. Rommel Francisco Marbil a nabukel ti grupo tapno parmekenda ti kumakaro a panagraira dagiti palso nga impormasion a pangta iti panagtalek ti publiko.
Nabukel ti JAFNAC kas sungbat ti PNP kadagiti nadumaduma nga alegasion maipapan iti pannakakidnap dagiti sumagmamano a nalatak a personalidad kalpasan ti pannakakidnap ken pannakapapatay ti negosiante nga Intsik a ni Anson Que.
Idaulanto ni Lt. Gen. Robert Robert Rodriguez, ti deputy chief for Operations ti PNP, ti mabuangay a JAFNAC.
Balikatan Exercise ti Filipinas, US, marugian ita nga aldaw
Segun ken ni Marbil, makitinnulong ti JAFNAC iti Joint Anti-Kidnapping Action Committee (JAKAC) a mapusgan a mangbigbig, agimbestigar, ken mangparmek kadagiti organisado nga operasion ti kidnap-for-hire iti pagilian.
Ni Police Lt. Gen. Edgar Alan Okubo, chief directorial staff ti PNP, ti mangidaulo iti JAKAC.
Innayon ni Marbil a dagiti nabukel a gunglo ti mangsaranget kadagiti pangta iti moderno a tiempo, manipud iti kidnap-for-hire a sindikato agingga iti digital disinformation. (Aaron Recuenco/Manila Bulletin//Lito Hilidon/Bannawag)
