Pimmusay ni Pope Francis, ti umuna a Hesuita ken Latino Amerikano a padi a nagbalin a Santo Papa, itoy nga aldaw, Lunes, iti Casa Santa Marta iti Batikano. Agtawen iti 88.
Impakaammo ti Batikano ti ipupusay ti Santo Papa babaen ti paskilna iti X (dati a Twitter), maysa nga aldaw kalpasan ti panagparang daytoy a naka-wheelchair tapno bendisionanna dagiti deboto iti St. Peter’s Square iti Aldaw ti Panagungar (Easter Sunday).
Nagpaay a Santo Papa iti uneg ti 12 a tawen, malaglagipto ni Pope Francis kadagiti panagbalbaliw nga inyusuatna iti Batikano a dinanonna idi 2013 kalpasan ti panaglusulos ni Pope Benedict XVI nga am-ammo a nangilaban iti panagtalinaed a konserbatibo ti Simbaan Romano Katoliko.
Iti biang ni Pope Francis, sabali a direksion ti nangituronganna iti Simbaan babaen ti ”pananglukatna” iti simbaan a nakaigapuan ti pannakisangdona kadagiti tradisionalista. Inkagumaanan ti Santo Papa agingga kadagiti maudi nga aldawna ti panagbalin ti Simbaan a kamang ti amin nangruna kadagiti gagangay a tattao idinto a nakiinnarakup met kadagiti dadduma a pammati. (Bannawag News Team)
