Uppat a vlogger ti naidarum iti Department of Justice (DOJ) ita a Martes, Abril 22, gapu iti mapapati a panangiwarasda iti "fake news" iti social media maipapan iti statement ni direktor ti National Bureau of Investigation (NBI) Jaime B. Santiago.
Nabigbig dagiti naidarum a da Maricel Tondi, Jennifer Dela Cruz, Jacinta Cayme Anatusada, ken Cherry Lyn David.
Iti referral letter a naiturong ken ni Prosecutor General Richard Anthony D. Fadullon ken pinirmaan ni Santiago, inrekomendar ti NBI a maidarum dagiti uppat gapu iti panaglabsingda iti Revised Penal Code, partikular ti panagusar iti alias iti babaen ti Article 178; maikontra iti linteg a wagas ti panagipablaak ken maikontra iti linteg a panagsao iti babaen ti Article 154; panangintriga maibusor iti dayaw iti babaen ti Article 364; ken inciting to sedition iti babaen ti Article 142--a mainaig amin iti Section 6 ti Republic Act No. 10175 (Cybercrime Prevention Act of 2012).
“Inggagara dagiti respondent nga inwaras ti palso nga impormasion, a pinangparangda nga impangta ti NBI Director nga arestuen amin nga OFW (overseas Filipino workers) idinto a kinapudnona, ti statement ti NBI Director ket mainaig laeng iti panangtiliw kadagiti kriminal, kalpasan ti pannakaipila kadagiti kaso kadakuada, a mabalin a nakabase iti ballasiw-taaw, ken saan a ti sibubukel nga OFW community nga isu ti inranta a pagparparangen dagiti respondent,” kinuna ti NBI.
Abogado ni Sara Duterte, agtalek a mangabakda iti impeachment case
Nagtaud ti kaso gapu iti maysa a video a naipaskil kadagiti social media platform a Tiktok ken Facebook a napauluan iti “Panakot ang bagong administrasyon ngayon. OFW ang mga bagong bayani bakit ninyo tinatakot?”
Impakita ti video ni Santiago nga agkunkunana iti: “Yung mga andito sa Pilipinas arestohin namin! Yong mga nasa abroad will file a case di na sila makakauwi dito, hindi na sila makakadalaw sa mga pamilya nila, pag dating palang sa NAIA aarestohin na namin sila."
Ngem segun iti NBI, ti dakdakamaten ni Santiago ket maipapan kadagiti linteg a salsalungasingen dagiti online troll.
Kuna ti NBI a ti sibubukel a kinuna ni Direktor Santiago ket: “Pinupukpok ko na aking Technical Intelligence Division, ang ating Cybercrime Division na umaksyon na, sobra na itong mga trolls, sobra na, kabastusan na pinaggagawa. Meron isa tutumbukin ko yun Maharlika at nandun sya sa Amerika, tira, tira nang tira but then pinapalabas dito sa Pilipinas, right? Therefore, pwede siyang kasuhan dito sa Pilipinas. Hihingi kami ng tulong sa Interpol, arestuhin nyo nga yang lokong yan dyan at dalhin dito sa Pilipinas. ‘Yung mga nandito sa Pilipinas, arestuhin namin, yung mga nasa abroad, we will file case, ‘di na sila makakauwi dito, ‘di na sila makakadalaw sa pamilya nila, pagdating palang sa NAIA, arrestuhin na namin sila."
Kinuna pay ti NBI: “Nalawag a ti panggep dagitoy a respondent a nangputedputed ken nangedit iti video/statement ni NBI Director Jaime B. Santiago ket naan-anay a panangatakar maibusor kenkuana.”
Ingganetget pay ti NBI nga awan a pulos ti pammaneknek a mangsuportar iti nasao a content dagiti vlogger ngem ketdi, inggagarada nga inikkat dagiti importante a content iti statement ken dakes ti motiboda a nangbaliw iti video tapno mapadakes ti Direktor ti NBI ket iti kasta, maallilawda ti publiko.” (Jeffrey Damicog/MB)
