Simmangpeten ti bapor ti Philippine Coast Guard (PCG) a BRP Gabriela Silang (OPV-8301) iti pagilian idi Abril 21, kalpasan ti dandani makabulan a panagdaliasatna iti Southeast Asia a nangsarungkaranna iti tallo a pagilian--iti Thailand, Malaysia, ken Vietnam--a mangitandudo iti panagtitinnulong ken panagkikinnaawatan.
Indauluan ni Commandant ti PCG Adm. Ronnie Gil Gavan ti seremonia ti panangpadanon kadagiti kameng ti 83-metro ti kaatiddogna a BRP Gabriela Silang nga idadauluan ni Captain Eleizer G. Ibarrientos iti Coast Guard Fleet Parade Ground iti Pier 13, Port Area, Manila.
Idi Marso 27, naibaon ti BRP Gabriela Silang iti 26-aldaw a panagdaliasat: iti Laem Chabang Port, Thailand manipud Abril 1 agingga 3; Port Klang Cruise Terminal, Malaysia manipud April 8 agingga iti 10; ken iti Tien Sa Port, Da Nang, Vietnam manipud Abril 14 agingga 17.
Pinatibker ti PCG ti pannakitinnulong dagiti kakaduada iti tallo a pagilian babaen ti nadumaduma nga aktibidad kas iti courtesy calls, professional exchanges, ship tours, people-to-people engagements, ken preparatory meetings.
Philippine Navy, naisayangkat iti patrol mission iti Bajo de Masinloc
Kas panangbigbig iti propesionalismo ken dedikasion dagiti opisial ken kameng ti BRP Gabriela Silang, naipaayanda iti Outstanding Achievement Award gapu ta nakatungpalda iti nakaibaonanda. (Martin Sadongdong/Manila Bulletin//Lito Hilidon/Bannawag)
