Pinirmaanen ni Presidente Ferdinand Marcos Jr. idi Abril 11 ti linteg ti umno ken madagdagus a pannakaitabon ti Filipino a Muslim, kas maitunos iti ritual ti Islam.
Maibatay iti Republic Act (RA) No. 12160 wenno ti Philippine Islamic Burial Act, maaramid ti pannakaitabon ti bangkay dagiti Muslim iti kabiitan a panawen, adda man wenno awan ti death certificate daytoy. Ngem masapul a ti nangaramid kadagiti ritual ti panangitanem, wenno ti kaasitgan a kabagian ti pimmusay, ti mangipakaammo iti ipapatay iti local health officer iti las-ud ti 14 nga aldaw kalpasan ti pannakaitabon ti bangkay.
No awan ti autorisado a health officer wenno ti authorized representative, masapul a maipakaammo ti ipapatay iti Office of the Mayor a mangaramid iti death certificate ken mangsertipikar iti cause of death no saanen a kasapulan a maeksamen ti bangkay.
Ngem no kasapulan a maeksamen ti bangkay, kuna ti linteg a masapul a mapakaammuan nga umuna ti pamilia ti pimmusay sakbay a maaramid ti ania man a pannakaeksamen nga isayangkat dagiti pannakabagi ti linteg a mangiggem iti kaso.
Abril 22, naideklarar a Day of National Mourning para ken Nora Aunor
Iti las-ud ti 30 nga aldaw kalpasan a maisagana ken masertipakaran ti death certificate, mayallatiw daytoy iti Local Civil Registrar tapno mairehistro.
No ti bangkay ket nasken a maibiahe wenno mairuar it maysa a pasdek, masapul a mairuar ti bangkay ti Muslim iti las-ud ti 24 nga oras iti ospital, medical clinic, funeral parlor, morgue, custodial ken prison facility, wenno ti kapadana a pasdek, wenno iti tao nga akinresponsibilidad iti bangkay.
Masapul a mabungon ti bangkay iti puraw a lupot ken maikabil iti airtight, leak-proof a cadaver bag wenno cadaver wooden box, ken maserraan babaen ti tape wenno benda.
Segun iti RA 12160, saan a mabalin a pengdan ti pannakairuar ti bangkay gapu iti di nabayadan a hospital bill, medikal a gastos, professional fees, cost of wrapping, wenno ania man a masapul a bayadan. Ngem masapul a mangaramid dagiti maseknan iti promissory note para kadagiti dida pay nabayadan nga obligasionda, wenno ania man a wagas ti panagbayad nga awaten ti sabali a partido.
Asino man a di mangiruar iti bangkay ti Muslim gapu iti saan a nabayadan nga obligasion iti ospital ket madusa babaen ti pannakaibalud iti las-ud ti maysa bulan agingga iti innem a bulan, wenno agmulta iti di nababbaba ngem ₱50,000, ngem saan a nasursurok ngem iti ₱100,000 wenno agpada, segun iti pangngeddeng ti korte.
No maysa a korporasion, gunglo, partner, wenno juridical entity ti aglabsing, maipataw ti dusa kadagiti kameng wenno opisial ti korporasion, gunglo, ahensia wenno juridical entity a nangaramid iti panaglabsing.
Mangrugi a maipatungpal ti Philippine Islamic Burial Act 15 nga aldaw kalpasan ti pannakaipablaak daytoy. (Betheena Unite/Manila Bulletin//Lito Hilidon/Bannawag)
