Maisupadi iti impablaak ti Chinese Navy, kinuna ti Armed Forces of the Philippines (AFP) nga insayangkat ti bapor ti Philippine Navy (PN) a BRP Apolinario Mabini (PS-36) ti maritime patrol operation iti asideg ti Bajo de Masinloc (Scarborough wenno Panatag Shoal) iti West Philippine Sea (WPS) idi ngudo ti kallabes a lawas.
Iti maysa nga statement, kinuna ni public affairs office chief ti AFP Col. Xerxes Trinidad idi Abril 21 a naaramid ti panagpatruliada kas maibatay iti Konstitusion ti Filipinas ken iti Republic Act 12064 wenno ti Philippine Maritime Zones Act.
Maitunos pay daytoy iti internasional a linteg, kangrunaan ti United Nations Convention on the Law of the Sea (UNCLOS), ken ti 2016 arbitral award a nangsupiat iti panangtagikua ti China iti sibubukel a South China Sea agraman dagiti paset ti WPS.
Kinuna ni Trinidad a paset latta ti Filipinas ti Bajo de Masinloc a masarakan 124 nautical miles manipud iti Masinloc, Zambales.
Abogado ni Sara Duterte, agtalek a mangabakda iti impeachment case
Nupay adda daytoy iti ikub ti 200-nautical mile nga exclusive economic zone (EEZ) ti Filipinas, nainget ti panangbantay dagiti bapor ti maritime force ti China a pakairamanan ti navy, coast guard, ken maritime militia kalpasan ti panagsinnangoda iti puersa ti Filipinas idi 2012.
Kinuna ti Chinese Navy a pinagtalawna ti bapor ti Filipinas a BRP Apolinario Mabini kalpasan ti maipagarup nga illegal a panangserrekda iti kadanuman a teritorio ti Bajo de Masinloc, nga awagan dagiti Intsik a Huangyan Dao, idi Abril 20.
Ngem kinuna ni Rear Adm. Roy Vincent Trinidad, a pannakangiwat ti AFP iti WPS, a saan a pudno ti impalgak ti Chinese Navy ket imbilangda daytoy a paset ti estratehia ti China a panangiwaragawagda tapno masukog ti kapanunotan dagiti umilida.
Impaganetget ni Trinidad a ti laeng Philippine Navy ken dagiti bapor ti Filipinas ti addaan kalintegan a mangkarit iti ania man a bapor nga agdakiwas iti taaw a sakupen ti Filipinas. (Martin Sadongdong/Manila Bulletin//Lito Hilidon/Bannawag)
