Binallaagan ti Korte Suprema (SC) ti publiko iti panagraira ti palso a court order, notices, issuances, ken advisory a maipagarup nga impaulog dagiti korte ken ti opisinada iti hudikatura.
Kagiddan daytoy ti ballaag ti panagwaras dagiti tao nga agpampammarang nga empleado wenno opisial ti korte.
Iti maysa a press briefing nga inangay ti Korte Suprema iti Siudad ti Baguio ita nga aldaw, Abril 23, impakdaar ni pannakangiwat ti SC Camille Sue Mae L. Ting nga amin a korte iti pagilian ket agusar laeng iti opisial a wagas ti komunikasion no mangipaulog iti pammilin, pakaammo, ken dadduma pay a dokumento ti korte.
Kinuna ni Ting a mabalin a beripikaren dagiti dokumento iti bukod a website ti Korte Suprema, Court of Appeals, Court of Tax Appeals, ken Sandiganbayan. Kadagiti nagtaud iti trial court, mabalin a beripikaren dagiti dokumento babaen ti Trial Court Locator ti website ti SC: https://sc.judiciary.gov.ph/court-locator/
Cardinal David, agpa-Roma tapno makipamumpon ken ni Pope Francis ken tapno makipaset iti pannakapili ti sumaruno a Santo Papa
Segun ken ni Ting, adu ti naawatda a reklamo iti SC mainaig kadagiti palso a dokumento ti korte, a no maminsan ket maipagarup a naggapu iti opisina ni Chief Justice Alexander G. Gesmundo.
Dimmawaten ti SC iti tulong kadagiti pannakabagi ti linteg ket nayawaten dagiti reklamo iti Office of the Judiciary Marshal.
Imbalakad ni Ting ti panagridam ti publiko, ket saanda a paallilaw, ken kanayon a beripikarenda no agpayso met laeng ti naawatda a dokumento, anunsio, wenno pakaammo manipud iti korte.
Mabalin nga idatag dagiti mapagduaduaan a dokumento wenno tao iti Judiciary Public Assistance Section iti [email protected] tapno maimbestigaran ken maaksionan daytoy. (Rey G. Panaligan/Manila Bulletin//Lito Hilidon/Bannawag)
