Naikeddeng a dar-ayan da Presidente Ferdinand Marcos Jr. ken First Lady Liza Araneta-Marcos ti pannakaitabon ni Papa Francis iti Siudad ti Vatican inton Sabado, Abril 25.
Daytoy ti kinompirmar ni undersecretary ti Presidential Communications Office Claire Castro ita nga aldaw, Abril 23.
Pimmusay ni Papa Francis iti edadna a 88 idi Abril 21, maysa nga aldaw kalpasan ti Easter Sunday Mass. Segun iti Vatican, stroke ken cardiac arrest ti impatay ni Papa Francis.
Idi Lunes, inladawan ni Presidente Marcos ni Papa Francis a kas kalaingan a papa iti panawenna, ta napno ti pammati ken kinapakumbaba gapu ta silulukat ti pusona kadagiti nakurapay ken mailanglangi.
Cardinal David, agpa-Roma tapno makipamumpon ken ni Pope Francis ken tapno makipaset iti pannakapili ti sumaruno a Santo Papa
Simmarungkar ni Papa Francis iti Filipinas idi 2015 kalpasan a binegbeg ti Super Typhoon Yolanda (Haiyan) ti pagilian idi 2013, ket nangangay iti misa iti Siudad ti Tacloban iti laksid ti napigsa nga angin ken bayakabak nga inyeg ti maysa pay a sumungsungad idi a bagyo.
Nangangay met ti misa ni Papa Francis iti Manila Cathedral ken iti Pontifical and Royal University of Santo Tomas bayat ti isasarungkarna. (Argyll Cyrus Geducos/Manila Bulletin//Lito Hilidon/Bannawag)
