Tallo a Filipino a kardinal, da Luis Antonio Tagle, Jose Advincula, ken Pablo Virgilio David, ti manamnama a makipartisipar iti papal conclave tapno mapili ti sumaruno a papa kalpasan ti ipupusay ni Papa Francis idi Abril 21.
Segun iti Apostolic Constitution Universi Dominici Gregis, a mangiturturay iti papal conclave, ti “karbengan a mangibotos iti Roman Pontiff ket eksklusibo a para laeng dagiti Kardinal ti Nasantuan nga Iglesia Romana, malaksid kadagiti nakadanonen iti maikawalopulo a kasangayda sakbay ti aldaw ti ipupusay ti Roman Pontiff wenno iti aldaw a mabakante ti Apostolic See.”
Iti ipupusay ni Papa Francis, sangailien ti Sistine Chapel ti Vatican ti nasurok sangagasut a kardinal nga awan pay 80 a tawenda para iti nalimed ken sagrado a pannakapili iti sumaruno a lider ti Simbaan a Katoliko.
Ti pannakipaset ti tallo a kardinal a Filipino--a kaunaan a mapasamak para iti Filipinas--itampokna ti nauneg ti ramutna a tawid a Katoliko ti pagilian ken ti dumakdakkel nga impluensiana iti sangalubongan a teolohia.
Uppat a nalatak a Filipina, mapadayawan
Dagiti tallo a kardinal, isu dagiti sumaganad:
Ni Kardinal Luis Antonio Tagle, ti agdama a Pro-Prefect for the Section of First Evangelization of the Dicastery for Evangelization ti Vatican. Raraemen ti kaaduan gapu iti theological expertise-na ken ti panangidaulona kadagiti sangalubongan nga aktibidad ti Simbaan.
Iti panagserbina kadagiti prominente a saad iti Vatican, maysa ni Tagle kadagiti nalatak a mapagpilian para iti kinapapa, a naisangsangayan kas kakaisuna nga Asiano kadagiti dadduma pay a posible a kandidato a mangsukat ken ni Papa Francis.
Ni Kardinal Jose Advincula, Arsobispo ti Manila, ket mangipampamaysa iti sosial a hustisia ken pastoral outreach, a manggubuay kadagiti natibker a koneksion kadagiti mailanglangi a komunidad.
Ni Kardinal Pablo Virgilio David, Obispo ti Kalookan, maysa a prominente a manangitantandudo kadagiti natawan a kalintegan ken sosial a hustisia, a mangipakita iti panagkumit ti Simbaan a mangtaming kadagiti karit ti kagimongan.
Dua pay a kardinal a Filipino, da Orlando Quevedo, dati nga Arsobispo ti Cotabato, ken Gaudencio Rosales, dati nga Arsobispo ti Manila ken Lipa--ngem agpadan a nasurok a 80 ti tawenda.
Idinto a saandan a makabotos iti conclave, maikari pay laeng da Quevedo ken Rosales a makipaset kadagiti nainsapasapan a kongregasion, a makatulong iti panangituray ti Simbaan ken iti pannakaorganisar ti pannakapili ti sumaruno a papa.
Kas kadakkelan a pagilian a kaaduan ti Katoliko iti Asia, addaan ti Filipinas iti nasurok a 80 a milion a Katoliko.
Ibilang dagiti eksperto ti pannakipartisipar ti tallo a kardinal a Filipino kas pammaneknek iti dumakdakkel nga impluensia ti Filipinas iti pagannurotan ti Simbaan ken teolohikal a diskurso.
Kadagiti sumaganad a lawas, maitalimudok ti atension ti lubong ti conclave ket mapadaanan ti puraw nga asuk manipud iti Sistine Chapel a mangipasimudaag iti pannakabotos ti baro a papa-—maysa a pagteng a mangsukog iti panagdaliasat ti pammati ti agarup 1.39 bilion a Katoliko iti entero a lubong.
Asino ti sumaruno a papa?
Adda nalatak a pagsasao iti Vatican a "sumrekka iti conclave a kas papa, rummuarka a kas maysa a kardinal."
Ipasimudaag daytoy a ti sagrado ken nalimed a proseso ket saan a salip ti kinapopular wenno kampania ti kinalatak, no di ket maysa a nadiosan a pannakaipaltiing ti pannakapili ti Vicar ni Cristo iti Daga babaen kadagiti prinsipe ti iglesia.
Nupay kasta, naynay nga adda dagiti front-runner, a pagaammo kas "papabile," nga addaan iti uray sumagmamano laeng kadagiti galad a maibilang a kasapulan tapno agbalin a papa.
Kualipikado ti asino man a nabuniagan a lalaki a Katoliko, nupay dagiti laeng kardinal ti napili sipud pay idi 1378. Tapno mangabak, masapul ti di kumurang a dua a kakatlo ti botos manipud kadagiti kardinal nga awan pay 80 ti tawenda.
Maysa kadagiti posible a kandidato ni Kardinal Tagle.
Agparparang a ni Tagle, 67, ti pili ni Papa Francis para iti umuna a papa nga Asiano. Inayaban ni Papa Francis ti nalatak nga arsobispo ti Manila idiay Roma tapno idauluan daytoy ti opisina ti ebangnelisasion dagiti misionero ti Vatican, nga agserserbi kadagiti kasapulan ti Simbaan a Katoliko iti kaaduan a paset ti Asia ken Africa. (Merlina Hernando-Malipot/MANILA BULLETIN)
