Tallo a lallaki ti nasarakan a natay iti asideg ti balay ti maysa nga opisial ti barangay iti Purok 7, Brgy. San Julian, Siudad ti Tabuk, Kalinga iti agsapa ti Huebes, Abril 24.
Binigbig dagiti polis dagiti biktima a da Santos Calsiyao, Tokar Calsiyao, ken Leo Palat Calsiyao.
Segun ti imbestigasion dagiti polis, nangngegan dagiti putok ti paltog iti nagbaetan ti 6:30 ken 7:00 ti bigat iti asideg ti pagtaengan ni Barangay Kagawad Cleve Dumaguing, alyas Banatao, a kameng ti tribu ti Biga.
Nasarakan ti dua nga M16 rifle ken maysa a shotgun iti asideg ti bangkay dagiti biktima.
Mayor ti Rizal, Cagayan, napapatay bayat ti panagkampaniana
Kinuna dagiti polis a kameng dagiti biktima ti pamilia Calsiyao iti Brgy. Basao Dilag ti Tabuk.
Segun kadagiti polis, a mabalin a tribal dispute ("tribal war") wenno panagririri dagiti tribu ti makaigapu iti insidente. Gagangay a mangtigtignay iti riribuk wenno panaglalaban ti masasao a "tribal war" iti probinsia ti Kalinga.
Indagadag dagiti autoridad kadagiti tattao nga addaan iti impormasion maipapan iti insidente a makiumanda kadagiti pannakabagi ti linteg.
Kinondenar ni Police Col. James Mangili, hepe ti polis ti Kalinga, ti insidente ken nagapelar kadagiti pamilia dagiti biktima a palubosanda dagiti pannakabagi ti linteg a mangisayangkat iti trabahoda.
“Kiddawenmi iti publiko nga agtalinaed a kalmado tapno saan kumaro ti situsion. Ipasiguradomi iti publiko nga ar-aramiden ti PNP ti trabahona tapno mataginayon ti seguridad ken kinatalna ken kinaurnos,” kinuna ni Mangili. (Zaldy Comanda/MANILA BULLETIN)
