Indagadag ni Presidente Marcos kadagiti amin nga empleado ti gobierno nga usarenda ti kabaruan a teknolohia ken inobasion tapno mapasayaat ti serbisio publiko.
"Gundawaytayo daytoy ita nga agpanunot manen, ag-innovate, ken agserbi a nasaysayaat kadagiti umili babaen ti teknolohia," kinuna ni Marcos.
Impeksa ti Presidente daytoy bayat ti pormal a pannakaidatag ti napirmaan a Memorandum of Agreement iti Philippine Civil Service Digital Leadership Program Malacañan Palace itoy nga aldaw, Huebes, Abril 24.
Dinayawna met ti umuna a grupo dagiti agtrabtrabaho iti gobierno a nakaileppas iti panagsanay iti baro a teknolohia ti panagserbi iti gobierno a naangay idiay Singapore, ken sinaluduanna met ti Private Sector Advisory Council (PSAC) ken dagiti kakadua daytoy iti panangiwayatda iti programa.
Agtultuloy ti napudot a panawen idinto a di pay kangitingitan ti kalgaw --PAGASA
Kinunana nga idi Hunio 2023, insingasing ti PSAC Digital Infrastructure Sector Lead ti Philippine Civil Service Digital Leadership Program.
Idi Pebrero 14, 2025, inwaragawag ti PSAC ti panagtitinnulong dagiti nadumaduma a maseknan nga ahensia a nangitunda iti pannakasangal ti Memorandum of Agreement.
"Ita, natungpalen daytoy a gannuat," kinuna ti Presidente.
Iti daytoy a bulan, nakompleto ti umuna a batch a pakairamanan ti 30 a pannakabagi manipud iti Civil Service Commission (CSC) ti pilot training-da idiay Singapore.
Nagsublida dagitoy umuna a batch iti pagilian nga addaan kadagiti napateg a pannakaawat iti digital a panangidaulo, panagpanunot iti disenio a naisentro kadagiti umili, ken panagaramid iti desision a maiturong iti datos tapno makatulong a mangpamoderno iti pannakaipaay ti serbisio publiko, kas kinuna ti Presidente.
Innayon ti Pangulo nga iti nagbaetan ti agdama a tawen ken 2027, target ti Phase 2 ti programa a masanay ti di nakurkurang ngem 10,000 nga empleado ti gobierno.
"Naikkan iti kasapulan a paglaingan ken baro a perspektibo para iti serbisio publiko dagitoy nga empleado ti gobierno ket agbalindanto a katalista iti panangidaulo iti digital transformation ti burokrasiatayo manipud iti uneg," kinuna ti Presidente.
Nagyaman ti Chief Executive kadagiti nakikadua iti programa manipud iti CSC, National University of Singapore’s Institute of Systems Science, ken PSAC babaen ti Private Sector Jobs and Skills Corp. iti panangiwayatda iti gannuat.
Nagyaman pay kadagiti visionary partners a kas iti Temasek Foundation, SM Group, ken Ayala Group gapu iti di magatadan a suporta ken panagkumitda iti panangparang-ay iti panagbalbaliw iti sektor iti panagserbi iti publiko.
"Daytoy a panagkakadua ket mangyasideg kadakami iti pannakatungpal ti panggepmi a mangbangon iti modernisado a puersa ti panagtrabaho iti sektor publiko," kinuna ti Presidente.
Panggep ti programa a papigsaen ti digital leadership competencies dagiti mid to senior level officials iti entero a burokrasia ti Filipinas. Mangted daytoy kadagiti agtrabtrabaho iti gobierno kadagiti paglaingan a kasapulan tapno mangidauloda iti digital a panagbalbaliw iti uneg dagiti ahensiada, a mangitandudo iti ad-adda pay a kabaruanan, naisentro iti umili ken epektibo a gobierno.
