Napaltogan bayat ti panagkampaniana ti mayor ti Rizal, Cagayan a ni Atty. Joel A. Ruma iti Brgy. Illuru Sur idi rabii ti Mierkoles, Abril 23. Naideklarar a natay ti mayor kalpasan a naitaray iti maysa nga ospital.
Kandidato manen a para mayor ni Ruma iti eleksion inton Mayo 12, kaduana ti asawana a ni Atty. Brenda Ruma a para bise mayor.
Nairaman a nasugatan da Merson Abiguebel ken Melany Talay a residente iti nasao a barangay.
Segun iti imbestigasion, agpo-pose ni Ruma a makiretrato kadagiti supporter-na iti yan ti barangay hall iti agarup 9:30 p.m. idi pinaltogan dagiti di pay nabigbig a suspek.
3 a lallaki, napapatay iti Siudad ti Tabuk gapu iti mapapati a 'tribal war'
Naglibas a dagus dagiti suspek kalpasan ti pammaltog. Nagsagrap ni Ruma iti sugat ti bala iti makanawan nga abagana ken naitaray iti Tuao District Hospital iti ili ti Tuao a nakaideklararanna a natayen iti 10:31 p.m.
Naitaray met laeng dagiti nasugatan iti isu met la nga ospital sa nayakarda iti Cagayan Valley Medical Center iti Siudad ti Tuguegarao para iti naan-anay a pannakatamingda.
Kinuna ni Police Major Sherwin C. Viernes, hepe ti PNP ti Rizal, nga agtultuloy ti pursuit operations kontra kadagiti suspek kasta met ti naan-anay nga imbestigasion.
Nangiwayaten ti Cagayan Police Provincial Office iti Special Investigation Task Group a mangtaming iti insidente.
Kinondenar met ni Police Brig. Gen. Antonio P. Marallag Jr., direktor ti Police Regional Office 02, ti pammaltog ken nagapelar kadagiti umili nga ibinglayda koma ti ania man nga impormasion iti PNP a mangitunda iti pannakabigbig ken pannakatiliw dagiti suspek ken iti utek ti pammaltog. (Liezle Basa Iñigo, Freddie Lazaro/MANILA BULLETIN//Cagayan Provincial Information Office)
