Dakkel a tulong ti nagun-od ni kandidato a Senador Camille Villar iti kampaniana ti panangipanamnama dagiti kangrunaan a politiko iti Lanao del Norte ti naan-anay a suportada iti kenkuana bayat ti isasarungkarna iti nasao a probinsia idi Martes.
Inyendorso ni Diputado Khalid Dimaporo, mangibagi iti Umuna a Distrito ti probinsia, ni Villar. Impanawaganna kadagiti umili ti Lanao a suportaranda ti kandidatura ni Villar iti eleksion inton Mayo. “Patienmi a ni Camille Villar ti mangyeg iti pudno ket nabatad a panagdur-as iti komunidadtayo,” kinuna ni Dimaporo.
Napasingkedan ti suporta ti probinsia ken ni Villar iti panangsegundar ni Gobernador Imelda “Angging” Dimaporo iti panangyendorso ni Diputado Dimaporo ken ni Villar iti sabali pay a panagkampania. Babaen ti panangurnos dagiti Dimaporo, naaddan pay iti gundaway ni Villar a nangilawlawag ti sirmata ken dagiti ipangpangrunana a mapagbalin a linteg iti pannakisaritana iti adu kadagiti mayor ti nasao a probinsia ken dagiti kandidato.
Iti panagbitlana, impaganetget ni Villar a nasken ti madagdagus a pannakabaliw ti agrikultura ti Filipinas iti ad-adda a makaay-ayo ken sustainable a sektor, para kadagiti ub-ubbing a henerasion. Impaganetgetna a masapul dagiti programa ti panagsanay, nasaysayaat ken napimpimtas nga alikamen, ken moderno a teknolohia tapno mapasayaat ti produksion ket mapatalged ti suplay ti taraon iti pagilian.
Tour of Luzon, agsubli iti kalsada ita a Huebes
“Kasapulan a pagbalinentayo ti agrikultura a maitutop ken nadayaw a pagbiagan—daytay maipagpannakkel dagiti agtutubo,” kinuna ni Villar.
Inyunay-unayna pay ti napateg nga akem ti impraestruktura iti panangpapartak iti panagrang-ay iti rehion ken iti pagilian. Dinakamatna ti proyekto a naipasdek bayat ti panagtakem ti kabsatna a ni Senador Mark Villar kas Secretary of Public Works and Highways, ti Pangil Bay Bridge, maysa a 3.77 kilometro a namagsilpo iti Misamis Occidental ken Lanao del Norte, kas modelo ti transformative development a mangkissay iti oras ti panagbiahe ken mangparang-ay iti lokal nga ekonomia.
Dinayaw pay ni Villar ti inana a ni Senador Cynthia Villar gapu iti panangikampania daytoy iti Senado ti panangidur-as ti agrikultura. Dinakamatna ti nasurok a P200 milion a makinaria ken pinansial a tulong a naipaay iti 71 a kooperatiba iti Lanao del Norte iti panangidaulo ti inana.
"Pammaneknek dagitoy a proyekto a ti estratehiko a panagpuonan iti agrikultura ken impraestruktura, mabalinna baliwan ti biag. Panggepko nga ituloy dayta," kinunana.
Malaksid iti agrikultura ken impraestruktura, pinasingkedan ni Villar ti karina a mangitandudo kadagiti dadduma pay a kangrunaan a sektor pakairamanan ti youth empowerment, maternal welfare, senior citizens’ rights, ken suporta para kadagiti Overseas Filipino Workers.
Babaen dagiti broad-based endorsement ken plataporma a nagramut iti panagtultuloy ken panagpabaro, panggep ni Camille Villar nga ipaay ti tinawidna iti pamiliana a panagserbisio iti baro a kapitulo ti nailian a panangidaulo.
