Imbutaktak ti maysa nga opisial ti National Security Council (NSC) ita a Huebes, Abril 24, nga adda dagiti indikasion ti mapapati a suportado wenno inisponsoran ti China nga information operations iti Filipinas a nairanta a makibiang iti masungad a midterm elections inton Mayo.
"Adda dagiti pasimudaag a maisaysayangkat dagiti information operation nga inisponsoran ti China iti Filipinas ken aktual a makibiang iti masungad nga eleksion," kinuna ni assistant director general ti NSC Jonathan Malaya kabayatan ti hearing ti Special Committee on Philippine Maritime and Admiralty Zones.
Iti hearing, sinaludsod ni Senador Francis Tolentino ken ni Malaya no napaliiw ti NSC dagiti pagilasinan a mangisingasing iti pannakibibiang dagiti ganggannaet, a partikular a mangpumpuntiria kadagiti "pro-sovereignty" a kandidato wenno dagiti kontra-China a pagtaktakderan wenno kapanunotan.
Imbatad ni Malaya nga adda pay dagiti pasimudaag ti agtultuloy nga operasion ti China a mangsupsuportar kadagiti kandidato a kayatda a mangabak.
Agtultuloy ti napudot a panawen idinto a di pay kangitingitan ti kalgaw --PAGASA
"Itong mga ganitong pangyayari 'di to naiintindihan kaagad ng sambayanan dahil ito'y nakahalo na sa social media, di mo na alam alin dito yung totoo, is that correct?" sinaludsod ni Tolentino.
Apirmatibo ti sungbat ni Malaya.
"Ang nakikita po kasi namin, Mr. Chairman ket adu dagiti salaysay na lumalabas, kas pagarigan, manipud Beijing nga i-amplify dagiti third party individuals, mga proxy nila. Based here in the Philippines," kinuna ni Malaya.
Kinunana a masansan a rumsua dagitoy a naratibo bayat dagiti sensitibo a panawen ti politika, kas kadagiti maisaysayangkat a surbey ti eleksion. Napaliiwna a dagitoy a punto a pagsasaritaan ket asideg a maitunos iti opisial a mensahe dagiti Chinese.
"Kung ano yung script na nanggagaling sa Beijing, yun din naman ang sinasabi nila dito sa Pilipinas," kinuna ni Malaya.
Dinakamatna ti madama a Balikatan joint military exercises kas pagarigan, a dagiti makunkuna a lokal a proxy ket nangipekpeksa iti pagtaktakderan ti Beijing a ti Balikatan drills ket mamagpeggad iti rehional a kinatalna ken kinatalged.
Nabigbig metten ti NSC ti sumagmamano a kandidato a mapapati a mapumpuntiria kadagiti disinformation campaign.
"Identified na rin namin yung mga kandidato. Sinisiraan nila... ni Senador Tolentino isa sa mga sinisiraan because of his position on the Maritime Zones Law," kinuna pay ni Malaya.
Dinakamatna pay a kas pakaseknan dagiti influencer a Filipino a mapapati nga agtigtignay para iti interes ti People’s Republic of China.
Segun ken Malaya, kaaduan nga influencers, a dadduma kadakuada ti adda iti Filipinas ken ti dadduma ket nakabase iti China, agad-adalda sadiay, adda scholarship-da iti China nga igasgastosan ti estado ti China, ngem agtultuloyda nga agoperasion.
"Pinoy, wen, umilida a Filipino, ngem ar-aramidenda daytoy iti babaen ti pammilin ti PRC (People's Republic of China)," innayonna.
Pinattapatta ni Malaya a nasurok a sangapulo ti bilang dagiti aktibo nga influencer a mangiwarwaras kadagiti pro-China a naratibo, nga adu kadakuada ti nalatak iti online.
"You don’t have to be many kung may troll farm ka through a troll system utilizing artificial intelligence you can multiply yourself and be able to influence a public discourse," kinuna pay ni Malaya. (Dhel Nazario/MANILA BULLETIN)
