Agsubli iti kalsada ti Tour of Luzon, maysa kadagiti mapadpadaanan ken kalatakan nga isports ti kalgaw iti pagilian, ita a Huebes, Abril 24. Aganay a 119 a siklista manipud iti 17 a lokal ken ganggannaet a team ti agsasalisal iti makapagagar a walo nga stage a lumba.
Naituding a mangrugi ti umuna nga stage iti alas otso ti bigat iti sanguanan ti Simbaan ti San Agustin iti Paoay, Ilocos Norte, a maysa a world heritage site, ket tarayen dagiti siklista ti 190.7 a kilometro a manglasat kadagiti ili ti Pasuquin, Bangui ken Burgos, sa agsubli iti Marcos Avenue iti Paoay.
Ti Standard Insurance Philippines ti maysa kadagiti masipsiputan a team itoy a lumba a naawagan iti “The Great Revival” kalpasan a naisardeng idi 2019. Mapangnamnaman ken beterano dagiti mangbukel iti team a da Ronald Oranza, George Oconer, Ronald Lomotos, Jan Paul Morales, Junrey Navarra, Jeremy Lizardo, ken Dave Cangayao.
Ti 32-anios a ni Oranza, maipagpannakkelna ti panangabakna iti 3 a lumba ti UCI ken kas doble a bronze medalist iti 2023 Southeast Asian Games iti Cambodia. Ni met Morales, paset ti national team a nangabak iti bronse iti men’s team trial ti 2019 SEAG.
Suportado dagiti lider ti Lanao del Norte ni Camille Villar
Makisalisal pay iti lumba dagiti lokal a team nga Exodus Army Cycling Team, Go for Gold PH, Victoria Sports Pro Cycling Team, Dreyna Orient Cement, Excellent Noodles Cycling Team, Dandex T-Prime Cycling Team, MPT Drivehub Cycling Team, PH Under 23 Tom ‘N Toms Coffee, Crest Forwarder (1Team Visaya), One Cycling Mindanao, 7-Eleven Cliqq Roadbike PH, ken Team Pangasinan.
Idauluan met ti Gapyeong Cycling Team manipud South Korea dagiti ganggannaet a team a mangkarit kadagiti siklista a Filipino, agraman ti CCN Factory Racing Hong Kong, Malaysia Pro Cycling, ken Bryton Racing Team.
Kalpasan ti Paoay-Paoay Stage 1, agtultuloy ti 1,074.90-kilometro a lumba inton Biernes, Abril 25 babaen ti 68.39-km team trial Stage 2, 130.33-km Vigan-San Juan Stage 3, 162.97-km Agoo-Clark Stage 4, 166.65 Clark-Clark (via New Clark City) Stage 5, 168.19 Clark-Lingayen Stage 6, 15.14-km individual time trial Labrador-Lingayen Stage 7, ken ti maudi, ti Stage 8 a 172.53-km manipud Lingayen agingga pagleppasan ti lumba iti Scout Hill iti Camp John Hay iti Siudad ti Baguio.
Sakupen ti lumba ti di kumurang a 60 a siudad ken ili iti pito a probinsia iti Amianan ken Tengnga a Luzon: Ilocos Norte, Ilocos Sur, La Union, Pangasinan, Tarlac, ken Pampanga.
Aganay a ₱500,000 ti yawido ti indibidual nga overall winner idinto a ₱1 a milion ti premio ti overall team champion.
“Naragsak ken makapagagar a panawen para kadagiti amin a managayat ken fans ti cycling iti entero a pagilian ta mapaspasamak itan nga aldaw ti Great Revival of Tour of Luzon. Tagiuray ti cycling community ken managayat iti panagbisikleta daytoy a lumba,” kinuna ni Philcycling President Abraham “Bambol” Tolentino, a hepe pay ti Philippine Olympic Committee. (Kristel Satumbaga-Villar/MANILA BULLETIN)
