Iwarwaras ti maysa a babai dagiti kopia ti darum a naipila maibusor iti administrasion ni Trump para kadagiti kameng ti media sakbay ti news conference iti opisina ti Oregon Department of Justice idi Mierkoles, Abril 23, 2025, idiay Portland, Oregon. (AP Photo/Jenny Kane)

Sangapulo ket dua nga estado ti Estados Unidos ti nangidarum iti administrasion ni Presidente Donald Trump iti U.S. Court of International Trade iti New York idi Abril 23, 2025 tapno mapasardenga ti tariff policy ni Trump a kunada a maikontra iti linteg ken nangyeg iti pannakariribuk iti ekonomia ti Amerika.

Segun iti darum, ti annuroten nga impaulog ni Trump ket naibatay kadagiti “kapritsona imbes nga iti maiparbeng a panangipakat iti nainintegan nga autoridad.”

Kinarit ti darum ti pammati ni Trump a mabalinna ti basta lattan mangipakat kadagiti taripa maibatay iti International Emergency Economic Powers Act. Kidkiddawen ti darum iti korte a maideklarar nga illegal dagiti taripa, ken malapdan dagiti ahensia ti gobierno ken dagiti opisialna a mangipatungpal kadagitoy a taripa.

Dagiti estado a nailista kas nangipila iti darum ket ti Oregon, Arizona, Colorado, Connecticut, Delaware, Illinois, Maine, Minnesota, Nevada, New Mexico, New York, ken Vermont.

Internasional

Pope Francis, pimmusay iti edadna a 88

Iti maysa a waragawag, inawagan ni Attorney General ti Arizona Kris Mayes ti tariff scheme ni Trump a kas “minamauyong.”

Kinunana a “saan laeng a mangisagmak daytoy iti ekonomia no di ket illegal daytoy.”

Kinuna met ni Attorney General ti Connecticut William Tong a “dagiti awanan panangraem iti linteg ken nariribuk a taripa ni Trump ket nakaro a panangbuis kadagiti pamilia ti Connecticut ken didigra para kadagiti negosio ken panggedan iti Connecticut.”

Inkalintegan ti darum a ti laeng Kongreso ti addaan iti pannakabalin a mangipataw kadagiti taripa ket ti presidente ket mabalinna laeng nga ipakat ti International Emergency Economic Powers Act no ti emerhensia ket mangiparang iti “saan a gagangay ken naisangayan a a pangta” manipud iti ballasiw-taaw.

“Iti pananggundawayna iti autoridad a mangipabaklay iti nakadakdakkel ken agbaliwbaliw a taripa iti ania man a pilienna a tagilako a sumrek iti Estados Unidos, iti ania aman a rason a kombeniente para kenkuana a mangideklarar iti emerhensia, ginamsawen ti Presidente ti konstitusional a kinaurnos ken nangyeg iti riribuk iti ekonomia ti Amerika,” kuna ti darum.

Itay lawasna, indarum ni gobernador ti California Gavin Newsom ti administrasion ni Trump iti U.S. District Court iti Northern District of California gapu iti tariff policy, a kunana a mabalin a mapukawan ti estadona ti binilion a doliar a mapaspastrekna ta ti California ti kadakkelan nga importer iti Amerika. (ASSOCIATED PRESS)