Nasaripatpatan ti Philippine Navy (PN) ti maysa nga aircraft carrier, ti Shandong (CV-17), ken walo a barko iti agarup 2.23 nautical miles iti abagatan a laud ti Babuyan Islands idi Abril 22, 2025.
Kinuna ti Philippine Navy a naduktalanda dagiti barko a naurnos iti “saan a gagangay a formation” iti uneg ti archipelagic waters ti pagilian bayat ti agtultuloy a Balikatan Exercises iti nagbaetan ti Armed Forces of the Philippines (AFP) ken United States Indo-Pacific Command (Indopacom).
Addaan ti aircraft carrier a Shandong (CV-17) iti eskort nga innem a destroyer ken frigate ti People’s Liberation Army-Navy (PLA-N) ken dua a support vessel. Nabigbig ti maysa kadagiti support vessel a maysa nga electronic surveillance ship nga addaan iti numero nga AGI-797.
“Maysa daytoy kadagiti dadakkel ken saan a gagangay ti panagurnosda a barko a namonitormi,” kinuna ni Rear Adm. Roy Vincent Trinidad, pannakangiwat ti PN iti West Philippine Sea (WPS).
Pannakaimbestigar ti mapapati a pannakibibiang ti China iti eleksion, imbilin ti Malakanyang
Immuna a nadlawda dagiti barko ti China iti agarup sangagasut a nautical miles iti amianan a laud ti Burgos, Ilocos Norte idi Abril 22. Iti rabii ti Abril 23, umasidegda iti beddeng ti exclusive economic zone (EEZ) ti Filipinas iti akindaya a paset ti Cagayan.
Kinuna ni Trinidad a binallaagan ti PN dagiti barko a pakigubat ti China babaen ti radio babaen dagiti land-based monitoring system ngem “awan ti naawatmi a sungbat.”
“Nupay gagangay koma a sumungbat dagiti barko a pakigubat wenno ganggannaet a barko, adda dagiti sumagmamano a kanito a saan a sumungbat dagitoy. Kas iti daytoy saan nga isusungbat ti Shandong carrier battle group,” kinuna ni Rear Admiral Trinidad.
“Kayat ti Naval Forces Northern Luzon ti mangideploy kadagiti dadakkel a barko a pakigubat ngem naikomitda iti Balikatan,” inakona, nupay impaganetgetna a saan nga inikkan ti PN ti kaipapanan daytoy a deployment dagiti barko ti China, no adda wenno awan pakainaiganna iti Balikatan exercises.
Gagangay nga aggapu dagiti agop-operasion a barko ti China iti South Sea Fleet ti PLA isu a saan a nadlaw ti PN no sadino ti naggapuan dagitoy.
Nupay kasta, kinuna ni Trinidad a saan koma a ti kaadda dagiti barko a pakigubat ti China iti danum a sakup ti pagilian ti pakaseknan.
“Apay a saan? Ammomi nga addada, bambantayanmi ida, kueskuestionaranmi ti kaaddada dita,” kinunana.
(Martin Sadongdong/Manila Bulletin//Juan Asuncion/Bannawag)
