Mabalinen nga agkualipikado a kas solo paremt dagiti assawa dagiti overseas Filipino workers (OFW) ket usarenda dagiti maipapaay a benepisio ken pribilehio iti babaen ti Republic Act No. 11861 wenno Expanded Solo Parents Welfare Act, segun iti Department of Social Welfare and Development (DSWD).
Iti media forum ti DSWD idi Huebes, Abril 24, kinuna ni Assistant Secretary for Statutory Programs ti DSWD Ada Colico a dagiti assawa dagiti OFW nga agtrabtrabaho iti ballasiw-taaw iti di nakurang a maysa nga agtultuloy a tawen, partikular dagiti adda iti kategoria a low- wenno semi-skilled job, mabalin a maibilang a solo parent iti babaen ti linteg.
“Uray no mangipapaay ti asawa nga OFW iti pinansial a suporta, mabalin a mabigbig ti nabati nga asawana agmaymaysa a mangay-aywan kadagiti ubbingda ditoy Filipinas a kas solo parent,” inlawlawag ni Colico.
Segun iti RA 11861, ti solo parent ket maysa a tao nga is-isuna a mangipapaay iti panangaywan ken suporta a kas nagannak maigapu iti agdumaduma a kasasaad kas iti pannakabaybay-a, ipapatay ti asawa, panagsina, pannakawaswas ti kallaysa, pisikal wenno mental a kinaawan kabaelan ti asawa, wenno pannakaibalud nga addaan iti di nakurang a tallo a bulan a sentensia.
Pannakaimbestigar ti mapapati a pannakibibiang ti China iti eleksion, imbilin ti Malakanyang
Napalawa ti linteg tapno sakupenna ti ad-adu pay a kategoria a pakairamanan dagiti assawa dagiti OFW ken dadduma pay a mangay-aywan wenno mangtartaraken.
Maikari pay dagiti legal a guardian, adoptive wenno foster parents, ken kabagian iti las-ud ti maikapat a degree ti consanguinity wenno affinity a mangaklon iti naan-anay a responsabilidad iti maysa nga ubing wenno annak.
Mabalin met a kualipikado dagiti masikog nga awanan iti partner a mangipaay iti suporta.
Dinakamat ni Colico dagiti sumagmamano a benepisio a magun-od dagiti kualipikado a solo parent, a pakairamanan dagiti sumaganad:
* Binulan a cash subsidy a ₱1,000 manipud kadagiti local government unit (LGU) iti lugarda para kadagiti mangmangged iti minimum wage wenno nababbaba;
* Automatiko a masakupan ti PhilHealth babaen ti National Health Insurance Program (NHIP);
* Prioridad a pannakagun-od iti pagbalayan ken opotunidad iti panggedan iti gobierno;
* 10 a porsiento a diskuento ken VAT exemption kadagiti essential goods para kadagiti ubbing nga awan pay innem ti tawenda, para kadagiti nagannak nga agsusueldo iti nakurang a ₱250,000 iti tinawen;
* Pannakagun-od kadagiti scholarship ken programa ti edukasion manipud iti Department of ti Education (DepEd), Commission on Higher Education (CHED), kenTechnical Education and Skills Development Authority (TESDA).
Tapno magun-od dagitoy a benepisio, masapul nga opisial a mabigbig kas solo parent babaen dagiti LGU a responsable iti pannakaited kadagiti solo parent identification card.
“Saan a ti DSWD ti agited iti solo parent ID. Ipaay daytoy ti city wenno municipal social welfare and development office,” inlawlawag ni Colico. Innayonna a masapul a tinawen a mapabaro ti nasao nga ID. (Ellalyn De Vera-Ruiz/MANILA BULLETIN)
