Imbatad ti China nga awan ti interesna a makibiang iti umay a midterm elections ti Filipinas ken impaganetgetna a sursurotenna ti prinsipiona a saan a makibiang kadagiti  aramid dagiti dadduma a pagilian.

"Sursuroten ti China ti prinsipio a saan a pannakibiang kadagiti aramid dagiti dadduma a pagilian iti bukodda a pagilian. Awan ti interesmi a makibiang iti eleksion ti Filipinas," kinuna ni Guo Jiakun, spokesperson ti Foreign Ministry ti China, idi Abril 24.

Nasao ti opisial ti China daytoy kalpasan nga impalgak ti National Security Council (NSC) nga adda dagiti pagilasinan dagiti maipagarup nga igasgastuan ti China nga information operation iti pagilian.

Dagiti operasion, kinuna ni NSC Assistant Director General Jonathan Malaya, ket nairanta a makibiang iti 2025 midterm elections ti pagilian iti umay a Mayo.

Nasional

Ad-adu pay a barko ti China, nasaripatpatan iti sakup ti PH

Segun ken ni Malaya, adda dagiti pagilasinan kadagiti operasion ti China a mangsuportar kadagiti kandidato a kayatda a mangabak.

Imbatadna nga adu dagiti makitkitada a naratibo nga aggapgapu iti Beijing a pappapigsaen wenno iwarwaras dagiti third-party individuals wenno dagiti proxy-da a nakabase iti Filipinas.

Adda metten dagiti nakita ti NSC a sumagmamano a kandidato a maipagarup a puntiria dagiti disinformation campaign.

(Betheena Unite/Manila Bulletin// Juan A. Asuncion/Bannawag)