Imbilin ti Malakanyang ita a Biernes, Abril 25, ti madagdagus ken naun-uneg nga imbestigasion iti mapapati a pannakibibiang ti China iti midterm elections ti Filipinas.
Iti maysa a press briefing, imbatad ti ni Presidential Communications Office Undersecretary ken Palace Press Officer Claire Castro ti pannakaalarma gapu iti panangipalgak ti National Security Council (NSC) nga adda dagiti pasimudaag a makibibiang ti China iti eleksion inton Mayo 12.
Kinuna ni Castro a naammuanen ni Presidente Ferdinand Marcos Jr. ti mapapati a pannakibibiang dagiti ganggannaet.
“Ito po ay talagang nakakaalarma,” kinuna ni Castro.
Ad-adu pay a barko ti China, nasaripatpatan iti sakup ti PH
“Nakarating na po ito sa Pangulo. Kaya po kailangan po talaga ng maagaran, mas malalim na pag-iimbestiga,” innayonna.
Kinuna ni Castro a makiuman ti Malakanyang iti NSC tapno maammuan ti ad-adu pay maipapan iti mapapati a panggep ti China a makibiang iti politika ti Filipinas.
Bayat ti hearing ti Senate Special Committee iti maritime security idi Abril 24, kinuna ni Assistant Director General ti NSC Jonathan Malaya a “dagiti is-isponsoran ti estado ti China nga agtigtignay iti Filipinas ket aktual a makibibiang iti masungad nga eleksion.” (Ruth Abbey Gita-Carlos/Philippine News Agency)
