Bayat ti panagladingit ti Simbaan a Katoliko iti ipupusay ni Papa Francis, indagadag ti Catholic Bishops’ Conference of the Philippines (CBCP) kadagiti Katoliko a liklikanda koma ti mangitandudo iti publiko ken ni Kardinal Luis Antonio Tagle a kas maysa a potensial a sumublat iti kinapapa.
Impaganetget ti CBCP ti kasapulan a panangraem iti kinasagrado ken panagwaywayas ti proseso ti pannakapili ti sumaruno a papa.
Iti maysa nga interbiu iti Radio Veritas, namakdaar ni CBCP Episcopal Commission on Public Affairs Executive Secretary Rev. Jerome Secillano kontra kadagiti agwarwaras a panangidagadag iti online ken iti ikub dagiti sirkulo ti Simbaan a mangidurduron iti pannakapili ti kardinal a Filipino a kas sumaruno a papa.
“Italektayo kadagiti kardinal nga elektor ti pangngeddeng no asino ti sumublat ken ni Papa Francis. Saan a maiparbeng ti publiko a mangitandudo ken ni Kardinal Tagle kas sumaruno a papa, ta mabalin a mangpataud daytoy iti impresion a ti conclave ket naimpluensiaan iti ruar no mabotosan ni Kardinal Tagle kas sumaruno a papa,” kinuna ni Secillanmo.
Saan a Marcos:' Romualdez, Araneta ti mangiturturay it gobierno --Imee Marcos
Inyunay-unay ni Secillano, nga agserserbi kas pannakangiwat ti Arkidiosesis ti Manila, a masapul a maipatungpal ti panagbotos iti baro a papa nga addaan naan-anay a wayawaya ken awan ti ania man a porma ti external pressure wenno lobbying.
“Masapul a maraem ti panagwaywayas dagiti elektor, ket ti mabalin laeng a maaramidantayo ket ikararagantayo ni Kardinal Tagle ken dagiti dadduma pay a kardinal nga elektor,” innayonna.
Madama nga agserserbi ni Kardinal Tagle, 67, kas Pro-Prefect ti Dicastery for Evangelization ti Vatican, maysa kadagiti kaiimpluensiaan nga opisina iti Roman Curia.
Nagserbi nga Arsobispo ti Manila manipud 2011 agingga 2019 sakbay a dinutokan ni Papa Francis iti puestona iti Vatican.
Ti conclave ket maysa a sagrado a panagtataripnong dagiti kardinal nga elektor a naayaban a mangpili iti baro a papa kalpasan ti ipapatay wenno panaglusulos ti maysa a papa.
Dagiti laeng kardinal nga awan pay 80 ti tawenda iti tiempo ti ipapatay ti papa ti maikari nga agbotos.
Maangay dagiti deliberasion iti narikpan a Sistine Chapel iti Vatican, iti babaen ti nainget a kinalimed ken iwanwanwan ti nainkararagan a pannakaawat.
Segun iti CBCP, adda agdama a 135 a cardinal electors iti entero a lubong, a pakairamanan ti tallo manipud iti Filipinas, da Kardinal Tagle; Obispo ti Kalookan Kardinal Pablo Virgilio David, nga agdama a presidente ti CBCP; ken Arsobispo ti Manila Kardinal Jose Advincula.
Iti laksid ti panagraem ti publiko iti panangidaulo ken sangalubongan a kinalatak ni Kardinal Tagle, impaganetget dagiti opisial ti Simbaan a masapul a palubosan dagiti Katoliko nga agtultuloy ti conclave nga awan ti di umisu nga impluensia, ket agkaykaysada ketdi a mangikararag iti masakbayan ti Simbaan. (Jel Santos/MANILA BULLETIN)
