Impakaammo idi ti premiado a Filipino direktor a ni Lav Diaz ti planona a mangipabuya iti pelikulana a Magellan iti 2025 Cannes Film Festival itoy a Mayo.
Immunan a dinakamatna daytoy a kaudian a pelikulana iti Doha Film Institute’s Qumra lab, a nagkunaanna a kakalpasna laeng. Segun kenkuana, maipapan ken patay daytoy atiddog a pelikula.
“Ngem adda dagiti festival a tallo nga oras laeng ti kayatda nga ipabuya. Nakikompromiso met dagiti prodiuser,” kinunana. “Ngem adda kaniak ti sibubukel a pelikula.”
Sumagmamano a tawenen a mapaspasayaat ti Magellan. Immuna nga inggastuan ti Portuguese production company a Rosa Filmes idi 2019. Kalpasanna, timmulong ti Andergraun Films manipud iti Spain, Black Cap Pictures manipud iti Filipinas, ken Volos Films manipud iti Taiwan.
Pannakaimbestigar ti mapapati a pannakibibiang ti China iti eleksion, imbilin ti Malakanyang
Idi napagsaludsodan maipapan iti kaadda ti kinadamsak kadagiti pelikulana, insungbat ni Diaz: “Gagangay dayta iti kulturami. Naranggas unay dagiti Filipino. Napaneknekan ni Magellan dayta. Immay ditoy, pinatayda.”
Saan a napaay ni Lav iti planona ta idi Abril 10, inwaragawag ti Cannes Film Festival a maysa ti Magellan kadagiti siam a napili a pelikula a maipabuya iti umuna a gundaway iti prestihioso a film festival.
Maitampok kas Magellan ni Gael Garcia Bernal iti daytoy pelikula a dati a napauluan iti Beatrice, The Wife.
Dati, naipokus ti pelikula iti relasion da Magellan ken ti baketna a ni Beatrice ngem binaliwan ni Lav tapno mairaman ti ad-adu pay a perspektibo aglalo kadagiti naparmek a tattao a Malay.
Iti pakasaritaan ti Filipinas, nadiskobre ni Magellan, maysa a Portuguese nga eksplorer, ti Filipinas idi Marso 16, 1521. Natay iti Battle of Mactan.
(Robert Requintina/Manila Bulletin)
