Impasigurado ti Malakanyang iti publiko nga isaknap ti administrasion ni Presidente Ferdinand Marcos Jr. ti programa a kontra iti kinakurapay kalpasan ti pannakaipablaak ti surbey nga umad-adu ti bilang dagiti Filipino a mangibilang iti bagida a nakurapay.
Segun iti kaudian a surbey ti StratBase-SWS, 55 a porsiento dagiti Filipino ti mangibilang iti bagida a nakurapay idi Abril, a katukad ti 15.5 a milion a pamilia, no maidilig iti 14.4 a milion a pamilia idi Marso.
Kinuna ni Undersecretary ti Presidential Communications Office (PCO) Claire Castro a bigbigen ti administrasion dagiti lehitimo a surbey ket iramanda daytoy iti panangbukelda iti polisia.
Segun ken ni Sekretario ti Economic Planning Arsenio Balisacan, mabalin nga inapektaran ti resulta ti surbey ti implasion, wenno ti ingingina dagiti magatgatang.
Filipinas, New Zealand, agpirma iti tulag ti depensa
Kinuna ni Castro nga agtalinaed latta ti panggep ni Presidente Marcos Jr. a mangpasaknap kadagiti programa a mangtaming iti kinakurapay ken panagbisin.
Mairaman iti programa ti Walang Gutom Program ti Department of Social Welfare and Development (DSWD), ti Pantawid Pamilyang Pilipino Program (4Ps), ti School-Based Feeding Program, ken ti pannakaipatungpal ti ₱20 kada kilo a bagas.
Inlawlawag ni Castro a ti ₱20 kada kilo a bagas ti kangrunaan a kari ni Presidente Marcos Jr. idi panagkakampania, a manamnama a marugian inton Mayo 1 iti Cebu, nga imatonan dagiti local government unit (LGU) ti pannakaiwarasda.
Segun ken ni Castro, saan a pudno dagiti sayangguseng a saan a napintas ti kalidad ti bagas nga iwaras ti programa, ta nagtaud dagitoy kadagiti lokal a mannalon, ket saan nga inangkat.
Innayon ni Castro nga agpaut ti programa agingga iti Disiembre 2025 ket panggepda a maponduan daytoy iti sumaruno a national budget. (Argyll Cyrus Geducos/Manila Bulletin//Lito Hilidon/Bannawag)
