Naikeddeng a pirmaan ti Filipinas ken New Zealand ti tulag ti panangdepensa a mangipalubos iti militar ti dua a pagilian a mangisayangkat iti panagsanay iti teritorioda, segun ken ni Defense Minister ti New Zealand Judith Collins, ita nga aldaw, Abril 28.
Iti statement a naipaskil iti website ti gobierno ti New Zealand, agbiahe ni Collins iti Filipinas ita nga aldaw tapno pirmaanda ti Status of Visiting Forces Agreement (SoVFA). Agtalinaed ni Collins iti pagilian agingga iti Mayo 2.
Binukel da Prime Minister ti New Zealand Christopher Luxon ken Presidente Ferdinand Marcos Jr. ti tulag idi simmarungkar daytoy iti Filipinas idi napan a tawen.
Kalpasan a mapirmaan ti tulag, mayallatiw daytoy iti Senado tapno maratipikaran.
₱20 kada kilo ti bagas, maipatungpal iti umay a bulan
Bayat ti kaaddana iti Filipinas, maangay ti bilateral meeting da Collins, Presidente Marcos, ken Sekretario ti Department of National Defense (DND) Gilberto Teodoro Jr.
Daytoy ti bunga ti 2024 Mutual Logistics Supporting Arrangement ken ti 2012 Defense Cooperation Arrangement.
Immadu a pannakialiansa iti baybay ken depensa ti Filipinas gapu iti agresibo unay a tignay ti China iti rehion, a mangtagtagikua iti dandani entero a rehion, iti laksid ti pangngeddeng ti 2016 arbitral tribunal a pabor iti Filipinas. (Raymund Antonio/Manila Bulletin//Lito Hilidon/Bannawag)
