Dandani nakaala iti minilion a gatad ti kuarta ti 42-anios a lalaki manipud kadagiti desperado nga operator ti public utility vehicle (PUV) a na-embargo ti kolorum a luganda, babaen ti panagpammarangna kas hepe ti Land Transportation Office (LTO).
Naimbag ta bineripikar dagiti dadduma a bus operator ken ni LTO Chief Vigor D. Mendoza II a nangitunda iti pannakabigbig ken pannakaarestar ti suspek, a residente ti Rizal Province, iti maysa nga entrapment operation iti Cubao, Quezon City idi Abril 26.
Segun ken ni Mendoza, insayangkatna a dagus ti naan-anay a pannakaimbestigar ti insidente apaman a naammuanna a nagpammarang ti suspek a hepe ti LTO ken agdawdawat iti ₱250,000 para iti pannakairuar dagiti amin a naembargo a kolorum a lugan.
Dinutokan ni Mendoza ti hepe ti Intelligence and Investigation Division a ni Renante Melitante a nangimbestigar ken nangtiliw iti suspek.
₱20 kada kilo ti bagas, maipatungpal iti umay a bulan
Dimmawat ni Melitante iti tulong manipud kadagiti kameng ti Anti-Cybercrime Group of the Philippine National Police (PNP-ACG) iti pannakaimbestigar ken pannakakontak iti suspek babaen ti tulong ti dadduma a biktima.
Segun kadagiti dadduma a biktima, ti laeng kano suspek ti makabael a mangiruar kadagiti naembargo a luganda ket maaramid daytoy no mangtedda iti ₱250,000 tunggal lugan. Maysa a milion a pisos ti multa ti colorum violation.
Babaen ti pannakitinnulong dagiti biktma iti nagtipon a kameng ti LTO ken PNP-ACG, nabaelanda ti maki-transact iti suspek idi 1:45 ti malem ti Sabado, Abril 26, iti Cubao Terminal Complex, Times Square Avenue iti Siudad ti Quezon.
Naarestar ti suspek apaman nga inawatna ti boodle money a naabbongan iti namarkaan a ₱1,000. Naala manipud iti suspek ti namarkaan a kuarta, ti boodle money, driver’s license, ken dua a selpon.
Kalpasan daytoy, pinalagipan ni Mendoza dagiti operator ti PUV ken ti publiko a saanda a makiuman kadagiti scammer ken fixer para iti ania man a transaksion iti LTO.
Itay napan a tawen, nangipaulog ni Mendoza iti memorandum kadagiti amin nga opisial ti LTO a ti laeng court order ti mabalin a mangiruar iti naembargo a lugan gapu iti colorum violation.
Maidarum ti suspek iti kaso a panaglabsing iti Article 177 (Usurpation of Authority) ken iti Article 315 (Swindling/Estafa) ti Revised Penal Code mainaig iti Section 6 ti R.A. 10175, wenno ti “Cybercrime Prevention Act of 2012” ken iti Section 4 (b) (3) (Computer-Related Identity Theft) ti R.A. 10175. (Aaron Recuenco/Manila Bulletin//Lito Hilidon/Bannawag)
