Rummuar dagiti turista, ta sumrek dagiti kardinal.

Inserran ti Vatican ti Sistine Chapel tapno maisagana a paguummongan dagiti kardinal para iti conclave tapno pilienda ti agbalin a papa kalpasan ti ipupusay ni Papa Francis idi Abril 21 iti tawenna a 88.

Naitabon ni Francis idi Sabado kalpasan ti pannakaimassayagna iti St. Peter’s Square a nagtataripnongan dagiti dadaulo ti sangalubongan, ken agtultuloy ti siam nga aldaw a panagladingit sakbay a marugian ti makunkuna a conclave.

Maisagsaganan ti Sistine Chapel a pakaangayan ti conclave ket ikapkapetdan ti pagruaran ti asuk ken pangipuoranda kadagiti balota kalpasan ti panagbotos.

Nasional

Impeachment complaint kontra ken ni Presidente Marcos, saan pay a naipila iti Kamara

Segun iti schedule nga inkeddeng ti linteg ti Simbaan, marugian laeng ti conclave no malpas ti siam nga aldaw a panagladingit. Manamnama a mangrugi ti conclave iti nagbaetan ti Mayo 5 ken 10.

No mangrugin ti conclave, sumrek dagiti kardinal iti Sistine Chapel tapno makipasetda iti nalimed a proseso nga iwanwan ti Espiritu Santo a mangitunda iti pannakapili ti sumaruno a daulo ti 1.4 bilion a Simbaan a Katoliko. Agtalinaed a nakaserra dagiti ruangan ti chapel agingga nga adda mapili a baro a papa.

Nangisit nga asuk ti rummuar manipud iti tsimenea ti Sistine Chapel no awan pay ti napili a baro a papa; idinto a puraw nga asuk ti rummuar ken mapaguni dagiti kampana no addan napilida a kasukat ni Papa Francis.

Masapul a magun-od ti botos a dua a kakatlo ti amin a kardinal-elektor a tapno adda mapili nga agbalin a sumaruno a papa. (Associated Press/Manila Bulletin//Lito Hilidon /Bannawag)