Manamnama nga agtultuloy dagiti napipintas a programa ti Gunglo Dagiti Mannurat nga Ilokano iti Filipinas ken Ballasiw-Taaw (GUMIL Filipinas), iti pannakailayon para iti maysa pay a termino ni Ariel Sotelo Tabag, editor iti literatura ti Bannawag ken premiado a mannurat, agipatpatarus, ken agipabpablaak.
Naisayangkat ti eleksion ti gunglo bayat ti Dap-ayan 2025, ti tinawen a taripnong dagiti kameng ti GUMIL Filipinas, a naangay iti Santa Teresita, Cagayan iti Abril 26–27, 2025.
Segun ken ni Tabag, maitultuloy dagiti programa ti GUMIL a kas iti tinawen a Pasnaan Workshop, pannakaipablaak ti libro babaen ti Tagnawa Series, dagiti programa iti literatura a kadua dagiti nadumaduma a pagadalan, ahensia, ken organisasion, ken dadduma pay.
Iti ladawan, kakadua ni Tabag (sango, kakanigidan) a nabotosan nga opisial da, agpakanawan, da Elizabeth Madarang-Raquel (bise presidente), Faye Q. Flores-Melegrito (sekretaria heneral), Anna Liza M. Gaspar (tesorera), Rolando A. Seguro Jr. (auditor), Estela A. Bisquera-Guerrero (business manager), ken Mark Louie Tabunan (press relations officer).
Pacnis, indauluanna dagiti nangabak iti on-the-spot a panagsurat iti daniw
Nabotosan met a kameng ti hunta direktiba da (nakatakder, agpakanawan) Neyo Mario E. Valdez, Dr. Raquelito B. Cenal, Mario T. Tejada, Domingo A. Presa, Delfin P. Dumayas, Marlyn Garcia del Rosario, Avelina Fe Carlos-Camacho, ken Dr. Freddie P. Masuli.
Agtakem dagiti baro nga opisial ti GF iti dua a tawen (2025-2027). (MLT)
