Sipud nasumok ni Joseph Javiniar ti panagbisikleta a kas paglinglingayan innem a tawenen ti napalabas, nagbalinen a maysa kadagiti mapangnamnamaan ken taktikal a siklista ti pagilian iti agdama.
Maysa a pammaneknek ti siglatna ti panangparmek ken panangidaulona iti 160.6-kilometro nga Stage 5 ti 2025 Tour of Luzon a nangrugi ken nagpatingga iti Filinvest Mimosa Acacia Drive iti Clark, Pampanga.
Simmiasi ti 24-anios a tubo ti Pagsanjan, Laguna, a mangibagi iti Excellent Noodles team, iti eight-rider lead pack iti naudi a lima a kilometro a nang-solo a nagturong iti kinatan-ok iti finish line babaen ti time-na a 3 nga oras, 29 a minuto, ken 20 a segundo.
Nagsegunda met Jonel Carcueva ti MPT Drivehub idinto a maikatlo ni Marc Ryan Lago ti Go for Gold nga agpada a simmaruno ken ni Javiniar iti 42 a segundo a baet. Kaduada iti isu met la a time da Jeremy Lizardo ti Standard Insurance ken Nichol Pareja ti Victoria Sports.
Sara Duterte: Addaak iti listaan dagiti arestaren ti ICC
Kapangpangabakna iti national criterium race iti Tagaytay ita a tawen, kinuna ni Javiniar a sinurotda laeng ti game plan ti team para iti Stage 5.
“Ito talaga yung plano namin, ang maging agresibo nang sabay-sabay at nagawa naman namin,” kinuna ni Javiniar, a naglusulos iti trabahona kas waiter idi 2021 tapno maipamaysana ti competitive cycling.
“Sobrang hirap din nung ruta,” inaminna.
Pudno a makakarit ti naturod ken agsikkosikko a ruta ti lumba para kadagiti 108 a siklista, ngem ni Javiniar, agraman da Lizardo, Carcueva, Lago, Pareja, Erickson Lopez ken Nash Joshua Lim ri Dreyna Orion Cement, ken ni John Patrick Pagtalunan ti 7-Eleven Cliqq Roadbike Philippines, immabanteda a nasapa iti pito a kilometro a marka a simrek iti Saco Bridge iti New Clark City.
Nagtalinaed a sibubukel ti breakaway group iti entero a lumba, nga uray la nangipasdek iti tallo a minuto, 40 a segundo a baet iti peloton iti 70-km a marka.
In-inut a nagturong ti peloton iti maudi a 15 a kilometro a kaduadaa ti Koreano nga overall leader a ni Joo Dae Yeong ken dua kadagiti kakaduana iti Gapyeong Cycling Team iti sanguanan ti peloton, a nangkissay iti baet manipud iti lead group iti maysa laeng a minuto.
Maika-22 laeng a nagleppas ni Joo iti time-na a 3:30:28 a kaduana ti 57 a dadduma pay a siklista ngem nagtalinaed latta a suotna ti yellow jersey kas overall individual leader ti lumba babaen ti naurnong nga orasna a 14:07:40.
Sumegsegunda latta iti Koreano ni Ronald Oranza ti Standard Insurance iti 4 a minuto ken 30 a segundo a pangitarayan ni Joo kenkuana.
Nagtalinaed a maikatlo ni Aidan James Mendoza ti Go for Gold iti 4:36 nga oras a pagkamatanna.
Tinaginayon met ti Standard Insurance ti panangtengngelna iti team general classification babaen ti 56:50:50, a 19 laeng a segundo nga immun-una ngem iti MPT Drivehub ken 55 a segundo nga immun-una ngem ti Go for Gold.
Karit manen ti Stage 6 ita nga aldaw, Abril 29, a 174.5-km a ruta a mangrugi iti Filinvest Mimosa Acacia Drive iti Clark ken agleppas iti Maramba Blvd. iti Lingayen, Pangasinan. (Kristel Satumbaga-Villar/MANILA BULLETIN)
