Sinangaili ti lokal a gobierno ti ili ti Santa Teresita, Cagayan dagiti mannurat nga ilokano iti pannkaisayangkat ti Dap-ayan 2025, ti maika-57 a nailian a kombension ti Gunglo Dagiti Mannurat nga Ilokano iti Filipinas (GUMIL Filipinas) nga addaan tema a "Ni Mannurat kas Mangmangged," a naangay idi Abril 26-27, 2025 iti MDRRM Operation Center ti munisipio.
Mapan a nasurok a sangagasut a mannurat dagiti immatendar manipud iti nadumaduma a probinsia.
Pinadanon ni Mayor Atty. Rodrigo "Rambo" De Gracia, a nabara a nangpasangbay kadagiti delegado a manipud iti Ilocos Norte, Ilocos Sur, La Union, Abra, Abra, Pangasinan, Nueva Vizcaya, Isabela, Benquet, Metro Manila, ken iti Cagayan.
"Kas ama ti ili a Santa Teresita, naragsakankami a mangpasangbay kadagiti amin a delegado ditoy ingungotentayo nga ili. Naidumduma ti gagartayo ta dagiti mannurat a mabasbasatayo kadagiti panid ti Bannawag a binasbasatayo manipud pay idi ubbingtayo, umayda agsisinnukat ti kapanunotan ditoy mismo a lugartayo ken manamnama a mangibinglayda kadagiti kinasiribda kadagiti agngayangay a mannurat. Kangrunaanna, sipapannakkeltayo a mangpadanon kadagiti kabaddungalan dagiti mannurat a naggapu iti bukodtayo nga ili nga isuda a mismo nagbalin a kameng ti Bannawag ken lider met laeng ti GUMIL Filipinas, a gapu kadakuada, naibandera ti nagan ti patpatgentayo a Santa Teresita iti lubong ti literatura," kinunana.
Nayon a puersa ti polis para iti eleksion, naibaon iti Cagayan, Isabela
Innayon ni Mayor Rambo a pakaidayawan ti Santa Teresita ta iti laksid ti kinabassitna nga ili, ditoy pay ti nakapatanoran dagiti naruay a pagtamdan a mannurat iti lubong ti literatura Ilokano.
"Sipapannakkelkami a mangibalikas a mabalin a kadagiti sabsabali pay a propesion wenno sektor nga inkami pagbibinninglayan ket iti laksid ti kinanumo, adda gin-awa a mangsagrap ti tunggal umili. Sapay koma ta iti dua nga aldaw a kaaddayo ditoy lugarmi, inkayo met mananam ti dinakamatmi a rang-ay, regta, ken ragsak. Agyamankami met kadagiti ibatiyo nga adal ken inspirasion kadagiti agngayangay pay a mannurat ditoy ilimi ken kabangibangmi a lugar. Agbiag dagiti mannurat nga Ilokano, agbiag ti literatura nga Ilokano!" inggibusna.
Kas sungbat daytoy nabara a panangsangaili ti LGU Santa Teresita babaen ti liderato ni Mayor Rambo, numan pay pormal a nagyaman ni nailayon a presidente ti GUMIL Filipinas Ariel Sotelo Tabag, impeksana ti nalaus a panagyamanna iti naballigian nga aktibidad ti GUMIL Filipinas iti Santa Teresita. Kastoy man ti impaskilna iti social media kalpasan ti Dap-ayan: "Dios ti agngina, Kagumilan. Dios ti agngina, Kakailian. Makasangitak pay!" (Edison B. Tobias)
