Kinuna ni Sekretario ti Department of Justice (DOJ) Jesus Crispin C. Remulla ita nga aldaw, Abril 29, a dina kabuteng ti maidarum iti Office of the Ombudsman (OMB) gapu iti pannakaarestar ni dati a presidente Rodrigo R. Duterte.
Daytoy ti sungbat ni Remulla kalpasan nga inruar ni Senadora Imee Marcos ti singasingna a mangdagadag iti OMB a mangimbestigar ken mangidarum ken ni Remulla ken kadagiti opisial ti gobierno a mapapati a nairaman iti pannakaarestar ni Duterte idi Marso 11.
Insingasing daytoy ni Sen. Marcos kalpasan ti insayangkatna a hearing iti Senado maipapan iti pannakaarestar ni Duterte.
Nakemmeg ni Duterte babaen ti warrant of arrest nga impaulog ti International Criminal Court (ICC), ket nakabalud itan iti The Hague gapu iti kasona a crime against humanity maipuon kadagiti extrajudicial killing iti insayangkatna a war on drugs idi nagtakem a presidente.
Resulta ti panagimbestigar ni Sen. Marcos, saan nga inanamongan ti Presidente
Impaganetget ni Remulla nga inaramidda laeng ti patienda a rumbeng nga aramidenda para iti pagimbagan ti pagilian. (Jeffrey Damicog/Manila Bulletin//Lito Hilidon/Bannawag)
