Saanen a makipaset iti mapasungad a conclave ti Italiano a kardinal a ni Angelo Becciu tapno mangpili iti baro a papa.
Kalpasan ti kontrobersia a nakaipasungalngalanna idi 2020, kinuna ni Becciu a saan a makipaset iti ania man a conclave iti masanguanan. Ngem kadagiti kallabes nga aldaw impatalgedna nga adda kalinteganna a sumrek iti Sistine Chapel a kaduana ti dadduma a kardinal inton Mayo 7.
Sigud a naimpluensia a chief of staff ti Vatican ni Becciu, ken maysa a kangrunaan a kandidato a kas papa. Ngem naikkat daytoy idi 2020 kalpasan a pinilit daydi Pope Francis nga aglusulos iti akemna a kas daulo ti opisina a mangpili kadagiti santo, ken dagiti karbenganna a kas kardinal, gapu kadagiti alegasion kenkuana iti panaglabsing iti pinansial.
Inlibak ni Becciu dagitoy, ngem nausig iti Vatican criminal court ket nasarakan a nagbasol idi Disiembre 2023.
Sara Duterte, idarumna dagiti opisial ti gobierno a patienna a nangpaarestar iti amana
Saan nga apektaran ti panagkedked ni Becciu ti opisial a bilang ti Vatican iti conclave ta saan met a naibilang ni Becciu a mabalin nga agbotos.
Adda latta 135 a cardinal elector, ngem kinuna ni pannakangiwat ti Vatican Matteo Bruni idi Martes, Abril 29, nga adda dua a kardinal a nagpakada a di makaumay gapu iti parikut iti salun-atda, isu a 133 laengen dagiti cardinal elector. (Associated Press/Manila Bulletin//Lito Hilidon/Bannawag)
