Kayat ni Bise Presidente Sara Duterte nga idarum dagiti opisial ti gobierno a patienna a nangipatungpal iti pannakaarestar ni dati a presidente Rodrigo Duterte, kas dinakamat ni Senadora Imee Marcos iti resulta ti panagimbestigar ti Senado.
Iti maysa nga interbiu iti Sogod, Leyte idi Abril 29, nagyaman ni Duterte ken ni Sen. Marcos iti singasingna a maipila ti kaso a kriminal ken administratibo kontra kadagiti sumagmamano nga opisial ti administrasion ni Presidente Ferdinand Marcos Jr. gapu iti maipagarup nga illegal a pannakaarestar ti dati a presidente babaen ti International Criminal Court (ICC).
Kinarit ni Duterte ti administrasion ni Presidente Marcos nga idarumda dagiti nasao nga opisial maibatay iti singasing ni Sen. Marcos, no pudno a saan a politika ti makaigapu iti pannakaarestar ti dati a presidente.
Sakbayna, kiniddaw ni Sen. Marcos iti Office of the Ombudsman nga imbestigarenda da Sekretario ti Department of Justice (DOJ) Jesus Crispin Remulla, Sekretario ti Department of Interior and Local Government (DILG) Jonvic Remulla, Philippine National Police (PNP) Chief Gen. Rommel Marbil, PNP Criminal Investigation and Detection Group (CIDG) chief Nicolas Torre III, ken Special Envoy for Transnational Crimes Markus Lacanilao.
₱1.7-milion a balor ti puslit a sibuyas, nasamsam ti CIDG iti Pampanga
Insayangkat ni Sen. Marcos, a daulo ti Senate Committee on Foreign Relations, ti committee hearing iti pannakaarestar ti dati a presidente.
Pimmanaw ti reeleksionista a senadora iti senatorial slate ti partido ti kabsatna nga Alyansa para sa Bagong Pilipinas, ket inyendorso met ti bise presidente itay kallabes. (Raymund Antonio/Manila Bulletin//Lito Hilidon/Bannawag)
