Pormal a kinarit ti defense team ni dati a presidente Rodrigo Duterte ti hurisdiksion ti International Criminal Court (ICC) gapu iti mapapati a krimen a naaramidna iti panagtakemna a kas presidente.
Iti 38-panid a dokumento a naipila idi Mayo 1, kiniddaw ti defense team iti ICC Pre-Trial Chamber a waswasenda ti kaso agsipud ta awan ti karbengan ti ICC a mangituloy iti panagimbestigarda kalpasan a nagikkat ti Filipinas iti Rome Statute idi Marso 2019.
Segun iti depensa, masapul a naipakat ti hurisdiksion ti ICC sakbay a nagbalin nga epektibo ti yiikkat ti Filipinas, ket dinakamatda ti kinuna dagiti hues ti ICC a da Gocha Lordkipanidze ken Marc Perrin de Brichambaut. Innayon ti depensa a no nagbalinen nga epektibo ti panagikkat ti maysa nga Estado, saanen a maisayangkat ti prosecutor ti panagimbestigar.
Impaganetget ti depensa a segun iti Rome Statute, masapul a kameng pay laeng ti ICC ti maysa a pagilian idi inkeddeng ti ICC nga ipakat ti hurisdiksionna. (Argyll Cyrus Geducos/Manila Bulletin//Lito Hilidon/Bannawag)
